Therīgāthā 5.1 Pañcakanipāta

id: thig5.1 VRI: vol 56 สยามรัฐ: vol 26 26 segments

Therīgāthā 5.1 Pañcakanipāta Aññataratherīgāthā

“Paṇṇavīsativassāni, vri:56.314 yato pabbajitā ahaṁ; Nāccharāsaṅghātamattampi, cittassūpasamajjhagaṁ.

Aladdhā cetaso santiṁ, kāmarāgenavassutā; Bāhā paggayha kandantī, vihāraṁ pāvisiṁ ahaṁ.

Sā bhikkhuniṁ upāgacchiṁ, yā me saddhāyikā ahu; Sā me dhammamadesesi, khandhāyatanadhātuyo.

Tassā dhammaṁ suṇitvāna, ekamante upāvisiṁ; Pubbenivāsaṁ jānāmi, dibbacakkhu visodhitaṁ.

Cetopariccañāṇañca, sya:26.453 sotadhātu visodhitā; Iddhīpi me sacchikatā, patto me āsavakkhayo; Chaḷabhiññā sacchikatā, kataṁ buddhassa sāsanan”ti.

… Aññatarā therī ….