Cariyāpiṭaka Hatthināgavagga

0

Cariyāpiṭaka Hatthināgavagga Sīlapāramī 6 Rurumigarājacariya

1

“Punāparaṁ yadā homi, sutattakanakasannibho; Migarājā ruru nāma, paramasīlasamāhito.

2

Ramme padese ramaṇīye, vivitte amanussake; Tattha vāsaṁ upagañchiṁ, gaṅgākūle manorame.

3

Atha upari gaṅgāya, dhanikehi paripīḷito; Puriso gaṅgāya papati, ‘jīvāmi vā marāmi vā’.

4

Rattindivaṁ so gaṅgāya, sya:33.574 vuyhamāno mahodake; Ravanto karuṇaṁ ravaṁ, majjhe gaṅgāya gacchati.

5

Tassāhaṁ saddaṁ sutvāna, karuṇaṁ paridevato; Gaṅgāya tīre ṭhatvāna, apucchiṁ ‘kosi tvaṁ naro’.

6

So me puṭṭho ca byākāsi, attano karaṇaṁ tadā; ‘Dhanikehi bhīto tasito, pakkhandohaṁ mahānadiṁ’.

7

Tassa katvāna kāruññaṁ, vri:58.390 cajitvā mama jīvitaṁ; Pavisitvā nīhariṁ tassa, andhakāramhi rattiyā.

8

Assatthakālamaññāya, tassāhaṁ idamabraviṁ; ‘Ekaṁ taṁ varaṁ yācāmi, mā maṁ kassaci pāvada’.

9

Nagaraṁ gantvāna ācikkhi, pucchito dhanahetuko; Rājānaṁ so gahetvāna, upagañchi mamantikaṁ.

10

Yāvatā karaṇaṁ sabbaṁ, rañño ārocitaṁ mayā; Rājā sutvāna vacanaṁ, usuṁ tassa pakappayi; ‘Idheva ghātayissāmi, mittadubbhiṁ anāriyaṁ’.

11

Tamahaṁ anurakkhanto, nimminiṁ mama attanā; ‘Tiṭṭhateso mahārāja, kāmakāro bhavāmi te’.

12

Anurakkhiṁ mama sīlaṁ, nārakkhiṁ mama jīvitaṁ; Sīlavā hi tadā āsiṁ, bodhiyāyeva kāraṇā”ti.

13

Rurumigarājacariyaṁ chaṭṭhaṁ.