Itivuttaka 23 Ekakanipāta
id: iti23 VRI: vol 48 สยามรัฐ: vol 25 23 segments
Itivuttaka 23 Ekakanipāta Tatiyavagga Ubhayatthasutta
Vuttañhetaṁ bhagavatā vuttamarahatāti me sutaṁ:
“Ekadhammo, bhikkhave, bhāvito bahulīkato ubho atthe samadhigayha tiṭṭhati— sya:25.242 diṭṭhadhammikañceva atthaṁ samparāyikañca. Katamo ekadhammo? Appamādo kusalesu dhammesu. Ayaṁ kho, bhikkhave, ekadhammo bhāvito bahulīkato ubho atthe samadhigayha tiṭṭhati— diṭṭhadhammikañceva atthaṁ samparāyikañcā”ti. Etamatthaṁ bhagavā avoca. Tatthetaṁ iti vuccati:
“Appamādaṁ pasaṁsanti, vri:48.14 puññakiriyāsu paṇḍitā; Appamatto ubho atthe, adhigaṇhāti paṇḍito.
Diṭṭhe dhamme ca yo attho, yo cattho samparāyiko; Atthābhisamayā dhīro, paṇḍitoti pavuccatī”ti.
Ayampi attho vutto bhagavatā, iti me sutanti. Tatiyaṁ.