Itivuttaka 35 Dukanipāta
id: iti35 สยามรัฐ: vol 25 21 segments
Itivuttaka 35 Dukanipāta Paṭhamavagga Paṭhamajananakuhanasutta
Vuttañhetaṁ bhagavatā vuttamarahatāti me sutaṁ:
“Nayidaṁ, bhikkhave, brahmacariyaṁ vussati janakuhanatthaṁ, na janalapanatthaṁ, na lābhasakkārasilokānisaṁsatthaṁ, na ‘iti maṁ jano jānātū’ti. Atha kho idaṁ, bhikkhave, brahmacariyaṁ vussati saṁvaratthañceva pahānatthañcā”ti. Etamatthaṁ bhagavā avoca. Tatthetaṁ iti vuccati:
“Saṁvaratthaṁ pahānatthaṁ, brahmacariyaṁ anītihaṁ; Adesayi so bhagavā, nibbānogadhagāminaṁ.
Esa maggo mahattehi, anuyāto mahesibhi; Ye ye taṁ paṭipajjanti, yathā buddhena desitaṁ; Dukkhassantaṁ karissanti, satthusāsanakārino”ti.
Ayampi attho vutto bhagavatā, iti me sutanti. sya:25.252 Aṭṭhamaṁ.