Itivuttaka 58 Tikanipāta
id: iti58 สยามรัฐ: vol 25 23 segments
Itivuttaka 58 Tikanipāta Paṭhamavagga Taṇhāsutta
Vuttañhetaṁ bhagavatā vuttamarahatāti me sutaṁ:
“Tisso imā, bhikkhave, taṇhā. Katamā tisso? Kāmataṇhā, bhavataṇhā, vibhavataṇhā— imā kho, bhikkhave, tisso taṇhā”ti. Etamatthaṁ bhagavā avoca. Tatthetaṁ iti vuccati:
“Taṇhāyogena saṁyuttā, rattacittā bhavābhave; Te yogayuttā mārassa, ayogakkhemino janā; Sattā gacchanti saṁsāraṁ, jātīmaraṇagāmino.
Ye ca taṇhaṁ pahantvāna, vītataṇhā bhavābhave; Te ve pāraṅgatā loke, ye pattā āsavakkhayan”ti.
Ayampi attho vutto bhagavatā, iti me sutanti. sya:25.269 Navamaṁ.