Itivuttaka 62 Tikanipāta
id: iti62 VRI: vol 48 25 segments
Itivuttaka 62 Tikanipāta Dutiyavagga Indriyasutta
Vuttañhetaṁ bhagavatā vuttamarahatāti me sutaṁ:
“Tīṇimāni, bhikkhave, indriyāni. Katamāni tīṇi? Anaññātaññassāmītindriyaṁ, aññindriyaṁ, aññātāvindriyaṁ— imāni kho, bhikkhave, tīṇi indriyānī”ti. Etamatthaṁ bhagavā avoca. Tatthetaṁ iti vuccati:
“Sekhassa sikkhamānassa, ujumaggānusārino; Khayasmiṁ paṭhamaṁ ñāṇaṁ, tato aññā anantarā.
Tato aññāvimuttassa, ñāṇaṁ ve hoti tādino; Akuppā me vimuttīti, bhavasaṁyojanakkhayā.
Sa ve indriyasampanno, vri:48.40 santo santipade rato; Dhāreti antimaṁ dehaṁ, jetvā māraṁ savāhinin”ti.
Ayampi attho vutto bhagavatā, iti me sutanti. Tatiyaṁ.