← _

Theravāda Vinaya Bhikkhunivibhaṅga

id: pli-tv-bi-vb-pc17 VRI: vol 88 สยามรัฐ: vol 3 60 segments
Theravāda Vinaya Bhikkhunivibhaṅga Pācittiyakaṇḍa Rattandhakāravagga 17. Anāpucchāsantharaṇasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena sambahulā bhikkhuniyo kosalesu janapade sāvatthiṁ gacchantiyo sāyaṁ aññataraṁ gāmaṁ upagantvā aññataraṁ brāhmaṇakulaṁ upasaṅkamitvā okāsaṁ yāciṁsu. Atha kho sā brāhmaṇī tā bhikkhuniyo etadavoca— “āgametha, ayye, yāva brāhmaṇo āgacchatī”ti. Bhikkhuniyo— “yāva brāhmaṇo āgacchatī”ti seyyaṁ santharitvā ekaccā nisīdiṁsu ekaccā nipajjiṁsu. Atha kho so brāhmaṇo rattiṁ āgantvā taṁ brāhmaṇiṁ etadavoca— “kā imā”ti? “Bhikkhuniyo, ayyā”ti. “Nikkaḍḍhatha imā muṇḍā bandhakiniyo”ti, gharato nikkaḍḍhāpesi. Atha kho tā bhikkhuniyo sāvatthiṁ gantvā bhikkhunīnaṁ etamatthaṁ ārocesuṁ. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma bhikkhuniyo vikāle kulāni upasaṅkamitvā sāmike anāpucchā seyyaṁ santharitvā abhinisīdissantipi abhinipajjissantipī”ti …pe… “saccaṁ kira, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṁ santharitvā abhinisīdantipi abhinipajjantipī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṁ santharitvā abhinisīdissantipi abhinipajjissantipi. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī vikāle kulāni upasaṅkamitvā sāmike anāpucchā seyyaṁ santharitvā vā santharāpetvā vā abhinisīdeyya vā abhinipajjeyya vā, pācittiyan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Vikālo nāma atthaṅgate sūriye yāva aruṇuggamanā. Kulaṁ nāma cattāri kulāni— khattiyakulaṁ, brāhmaṇakulaṁ, vessakulaṁ suddakulaṁ. Upasaṅkamitvāti tattha gantvā. Sāmike anāpucchāti yo tasmiṁ kule manusso sāmiko dātuṁ, taṁ anāpucchā. Seyyaṁ nāma antamaso paṇṇasanthāropi. Santharitvāti sayaṁ santharitvā. Santharāpetvāti aññaṁ santharāpetvā. Abhinisīdeyyāti tasmiṁ abhinisīdati, āpatti pācittiyassa. Abhinipajjeyyāti tasmiṁ abhinipajjati, āpatti pācittiyassa. Anāpucchite anāpucchitasaññā seyyaṁ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite vematikā seyyaṁ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite āpucchitasaññā seyyaṁ santharitvā vā santharāpetvā vā abhinisīdati vā abhinipajjati vā, āpatti pācittiyassa. Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti. Anāpatti— āpucchā seyyaṁ santharitvā vā santharāpetvā vā abhinisīdati vā abhinipajjati vā, gilānāya, āpadāsu, ummattikāya, ādikammikāyāti. Sattamasikkhāpadaṁ niṭṭhitaṁ.