← _

Theravāda Vinaya Bhikkhunivibhaṅga

id: pli-tv-bi-vb-pc31 VRI: vol 88 สยามรัฐ: vol 3 33 segments
Theravāda Vinaya Bhikkhunivibhaṅga Pācittiyakaṇḍa Tuvaṭṭavagga 31. Ekamañcatuvaṭṭanasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena bhikkhuniyo dve ekamañce tuvaṭṭenti. Manussā vihāracārikaṁ āhiṇḍantā passitvā ujjhāyanti khiyyanti vipācenti— “kathañhi nāma bhikkhuniyo dve ekamañce tuvaṭṭessanti, seyyathāpi gihiniyo kāmabhoginiyo”ti. Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma bhikkhuniyo dve ekamañce tuvaṭṭessantī”ti …pe… “saccaṁ kira, bhikkhave, bhikkhuniyo dve ekamañce tuvaṭṭentī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, bhikkhuniyo dve ekamañce tuvaṭṭessanti. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhuniyo dve ekamañce tuvaṭṭeyyuṁ, pācittiyan”ti.
Yā panāti yā yādisā …pe… bhikkhuniyoti upasampannāyo vuccanti. Dve ekamañce tuvaṭṭeyyunti ekāya nipannāya aparā nipajjati, āpatti pācittiyassa. Ubho vā nipajjanti, āpatti pācittiyassa. Uṭṭhahitvā punappunaṁ nipajjanti, āpatti pācittiyassa. Anāpatti— ekāya nipannāya aparā nisīdati, ubho vā nisīdanti, ummattikānaṁ, ādikammikānanti. Paṭhamasikkhāpadaṁ niṭṭhitaṁ.