← _

Theravāda Vinaya Bhikkhunivibhaṅga

id: pli-tv-bi-vb-pc53 VRI: vol 88 สยามรัฐ: vol 3 50 segments
Theravāda Vinaya Bhikkhunivibhaṅga Pācittiyakaṇḍa Ārāmavagga 53. Gaṇaparibhāsanasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhaṇḍanakārikā hoti kalahakārikā vivādakārikā bhassakārikā saṅghe adhikaraṇakārikā. Thullanandā bhikkhunī tassā kamme karīyamāne paṭikkosati. Tena kho pana samayena thullanandā bhikkhunī gāmakaṁ agamāsi kenacideva karaṇīyena. Atha kho bhikkhunisaṅgho— “thullanandā bhikkhunī pakkantā”ti caṇḍakāḷiṁ bhikkhuniṁ āpattiyā adassane ukkhipi. Thullanandā bhikkhunī gāmake taṁ karaṇīyaṁ tīretvā punadeva sāvatthiṁ paccāgacchi. Caṇḍakāḷī bhikkhunī thullanandāya bhikkhuniyā āgacchantiyā neva āsanaṁ paññapesi na pādodakaṁ pādapīṭhaṁ pādakaṭhalikaṁ upanikkhipi; na paccuggantvā pattacīvaraṁ paṭiggahesi na pānīyena āpucchi. Thullanandā bhikkhunī caṇḍakāḷiṁ bhikkhuniṁ etadavoca— “kissa tvaṁ, ayye, mayi āgacchantiyā neva āsanaṁ paññapesi na pādodakaṁ pādapīṭhaṁ pādakaṭhalikaṁ upanikkhipi; na paccuggantvā pattacīvaraṁ paṭiggahesi na pānīyena āpucchī”ti? “Evañhetaṁ, ayye, hoti yathā taṁ anāthāyā”ti. “Kissa pana tvaṁ, ayye, anāthā”ti? “Imā maṁ, ayye, bhikkhuniyo— ‘ayaṁ anāthā appaññātā, natthi imissā kāci pativattā’ti, āpattiyā adassane ukkhipiṁsū”ti. Thullanandā bhikkhunī— “bālā etā abyattā etā netā jānanti kammaṁ vā kammadosaṁ vā kammavipattiṁ vā kammasampattiṁ vā”ti, caṇḍīkatā gaṇaṁ paribhāsi. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma ayyā thullanandā caṇḍīkatā gaṇaṁ paribhāsissatī”ti …pe… “saccaṁ kira, bhikkhave, thullanandā bhikkhunī caṇḍīkatā gaṇaṁ paribhāsatī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, thullanandā bhikkhunī caṇḍīkatā gaṇaṁ paribhāsissati. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī caṇḍīkatā gaṇaṁ paribhāseyya, pācittiyan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Caṇḍīkatā nāma kodhanā vuccati. Gaṇo nāma bhikkhunisaṅgho vuccati. Paribhāseyyāti “bālā etā abyattā etā netā jānanti kammaṁ vā kammadosaṁ vā kammavipattiṁ vā kammasampattiṁ vā”ti paribhāsati, āpatti pācittiyassa. Sambahulā bhikkhuniyo vā ekaṁ bhikkhuniṁ vā anupasampannaṁ vā paribhāsati, āpatti dukkaṭassa. Anāpatti— atthapurekkhārāya, dhammapurekkhārāya, anusāsanipurekkhārāya, ummattikāya, ādikammikāyāti. Tatiyasikkhāpadaṁ niṭṭhitaṁ.