Theravāda Vinaya Bhikkhunivibhaṅga
id: pli-tv-bi-vb-pc56 VRI: vol 88 สยามรัฐ: vol 3 35 segments
Theravāda Vinaya Bhikkhunivibhaṅga Pācittiyakaṇḍa Ārāmavagga 56. Abhikkhukāvāsasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. sya:3.190 Tena kho pana samayena sambahulā bhikkhuniyo gāmakāvāse vassaṁvuṭṭhā sāvatthiṁ agamaṁsu. Bhikkhuniyo tā bhikkhuniyo etadavocuṁ— “katthāyyāyo vassaṁvuṭṭhā? Kacci ovādo iddho ahosī”ti? “Natthayye, tattha bhikkhū; kuto ovādo iddho bhavissatī”ti. Yā tā bhikkhuniyo appicchā …pe… tā ujjhāyanti khiyyanti vipācenti— vri:88.428 “kathañhi nāma bhikkhuniyo abhikkhuke āvāse vassaṁ vasissantī”ti …pe… “saccaṁ kira, bhikkhave, bhikkhuniyo abhikkhuke āvāse vassaṁ vasantī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, bhikkhuniyo abhikkhuke āvāse vassaṁ vasissanti. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī abhikkhuke āvāse vassaṁ vaseyya, pācittiyan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Abhikkhuko nāma āvāso na sakkā hoti ovādāya vā saṁvāsāya vā gantuṁ. “Vassaṁ vasissāmī”ti senāsanaṁ paññapeti pānīyaṁ paribhojanīyaṁ upaṭṭhapeti pariveṇaṁ sammajjati, āpatti dukkaṭassa. Saha aruṇuggamanā āpatti pācittiyassa. Anāpatti— vassupagatā bhikkhū pakkantā vā honti vibbhantā vā kālaṅkatā vā pakkhasaṅkantā vā, āpadāsu, ummattikāya, ādikammikāyāti. Chaṭṭhasikkhāpadaṁ niṭṭhitaṁ.