← _

Theravāda Vinaya Bhikkhunivibhaṅga

id: pli-tv-bi-vb-pc85 VRI: vol 88 สยามรัฐ: vol 3 49 segments
Theravāda Vinaya Bhikkhunivibhaṅga Pācittiyakaṇḍa Chattupāhanavagga 85. Yānasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo yānena yāyanti. Manussā ujjhāyanti khiyyanti vipācenti— “kathañhi nāma bhikkhuniyo yānena yāyissanti, seyyathāpi gihiniyo kāmabhoginiyo”ti. Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma chabbaggiyā bhikkhuniyo yānena yāyissantī”ti …pe… “saccaṁ kira, bhikkhave, chabbaggiyā bhikkhuniyo yānena yāyantī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, chabbaggiyā bhikkhuniyo yānena yāyissanti. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī yānena yāyeyya, pācittiyan”ti. Evañcidaṁ bhagavatā bhikkhunīnaṁ sikkhāpadaṁ paññattaṁ hoti. Tena kho pana samayena aññatarā bhikkhunī gilānā hoti, na sakkoti padasā gantuṁ …pe… bhagavato etamatthaṁ ārocesuṁ …pe… anujānāmi, bhikkhave, gilānāya bhikkhuniyā yānaṁ. Evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī agilānā yānena yāyeyya, pācittiyan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Agilānā nāma sakkoti padasā gantuṁ. Gilānā nāma na sakkoti padasā gantuṁ. Yānaṁ nāma vayhaṁ ratho sakaṭaṁ sandamānikā sivikā pāṭaṅkī. Yāyeyyāti sakimpi yānena yāyati, āpatti pācittiyassa. Agilānā agilānasaññā yānena yāyati, āpatti pācittiyassa. Agilānā vematikā yānena yāyati, āpatti pācittiyassa. Agilānā gilānasaññā yānena yāyati, āpatti pācittiyassa. Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā, anāpatti. Anāpatti— gilānāya, āpadāsu, ummattikāya, ādikammikāyāti. Dutiyasikkhāpadaṁ niṭṭhitaṁ.