← _

Theravāda Vinaya Bhikkhunivibhaṅga

id: pli-tv-bi-vb-pc9 VRI: vol 88 สยามรัฐ: vol 3 52 segments
Theravāda Vinaya Bhikkhunivibhaṅga Pācittiyakaṇḍa Lasuṇavagga 9. Dutiyauccārachaḍḍanasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena aññatarassa brāhmaṇassa bhikkhunupassayaṁ nissāya yavakhettaṁ hoti. Bhikkhuniyo uccārampi passāvampi saṅkārampi vighāsampi khette chaḍḍenti. Atha kho so brāhmaṇo ujjhāyati khiyyati vipāceti— “kathañhi nāma bhikkhuniyo amhākaṁ yavakhettaṁ dūsessantī”ti. Assosuṁ kho bhikkhuniyo tassa brāhmaṇassa ujjhāyantassa khiyyantassa vipācentassa. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma bhikkhuniyo uccārampi passāvampi saṅkārampi vighāsampi harite chaḍḍessantī”ti …pe… “saccaṁ kira, bhikkhave, bhikkhuniyo uccārampi passāvampi saṅkārampi vighāsampi harite chaḍḍentī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, bhikkhuniyo uccārampi passāvampi saṅkārampi vighāsampi harite chaḍḍessanti. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī uccāraṁ vā passāvaṁ vā saṅkāraṁ vā vighāsaṁ vā harite chaḍḍeyya vā chaḍḍāpeyya vā, pācittiyan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Uccāro nāma gūtho vuccati. Passāvo nāma muttaṁ vuccati. Saṅkāraṁ nāma kacavaraṁ vuccati. Vighāsaṁ nāma calakāni vā aṭṭhikāni vā ucchiṭṭhodakaṁ vā. Haritaṁ nāma pubbaṇṇaṁ aparaṇṇaṁ yaṁ manussānaṁ upabhogaparibhogaṁ ropimaṁ. Chaḍḍeyyāti sayaṁ chaḍḍeti, āpatti pācittiyassa. Chaḍḍāpeyyāti aññaṁ āṇāpeti, āpatti dukkaṭassa. Sakiṁ āṇattā bahukampi chaḍḍeti, āpatti pācittiyassa. Harite haritasaññā chaḍḍeti vā chaḍḍāpeti vā, āpatti pācittiyassa. Harite vematikā chaḍḍeti vā chaḍḍāpeti vā, āpatti pācittiyassa. Harite aharitasaññā chaḍḍeti vā chaḍḍāpeti vā, āpatti pācittiyassa. Aharite haritasaññā, āpatti dukkaṭassa. Aharite vematikā, āpatti dukkaṭassa. Aharite aharitasaññā, anāpatti. Anāpatti— oloketvā chaḍḍeti, khettamariyāde chaḍḍeti, sāmike āpucchitvā apaloketvā chaḍḍeti, ummattikāya, ādikammikāyāti. Navamasikkhāpadaṁ niṭṭhitaṁ.