← _

Theravāda Vinaya Bhikkhunivibhaṅga

id: pli-tv-bi-vb-pc95 VRI: vol 88 สยามรัฐ: vol 3 40 segments
Theravāda Vinaya Bhikkhunivibhaṅga Pācittiyakaṇḍa Chattupāhanavagga 95. Pañhāpucchanasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena bhikkhuniyo anokāsakataṁ bhikkhuṁ pañhaṁ pucchanti. Bhikkhū ujjhāyanti khiyyanti vipācenti— “kathañhi nāma bhikkhuniyo anokāsakataṁ bhikkhuṁ pañhaṁ pucchissantī”ti …pe… “saccaṁ kira, bhikkhave, bhikkhuniyo anokāsakataṁ bhikkhuṁ pañhaṁ pucchantī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, bhikkhuniyo anokāsakataṁ bhikkhuṁ pañhaṁ pucchissanti. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī anokāsakataṁ bhikkhuṁ pañhaṁ puccheyya, pācittiyan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Anokāsakatanti anāpucchā. Bhikkhunti upasampannaṁ. Pañhaṁ puccheyyāti suttante okāsaṁ kārāpetvā vinayaṁ vā abhidhammaṁ vā pucchati, āpatti pācittiyassa. Vinaye okāsaṁ kārāpetvā suttantaṁ vā abhidhammaṁ vā pucchati, āpatti pācittiyassa. Abhidhamme okāsaṁ kārāpetvā suttantaṁ vā vinayaṁ vā pucchati, āpatti pācittiyassa. Anāpucchite anāpucchitasaññā pañhaṁ pucchati, āpatti pācittiyassa. Anāpucchite vematikā pañhaṁ pucchati, āpatti pācittiyassa. Anāpucchite āpucchitasaññā pañhaṁ pucchati, āpatti pācittiyassa. Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti. Anāpatti— okāsaṁ kārāpetvā pucchati, anodissa okāsaṁ kārāpetvā yattha katthaci pucchati, ummattikāya, ādikammikāyāti. Dvādasamasikkhāpadaṁ niṭṭhitaṁ.