← _

Theravāda Vinaya Bhikkhunivibhaṅga

id: pli-tv-bi-vb-ss2 VRI: vol 88 สยามรัฐ: vol 3 98 segments
Theravāda Vinaya Bhikkhunivibhaṅga Saṅghādisesakaṇḍa 2. Corīvuṭṭhāpikāsikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena vesāliyaṁ aññatarassa licchavissa pajāpati aticārinī hoti. Atha kho so licchavi taṁ itthiṁ etadavoca— “sādhu viramāhi, anatthaṁ kho te karissāmī”ti. Evampi vuccamānā nādiyi. Tena kho pana samayena vesāliyaṁ licchavigaṇo sannipatito hoti kenacideva karaṇīyena. Atha kho so licchavi te licchavayo etadavoca— “ekaṁ me, ayyo, itthiṁ anujānāthā”ti. “Kā nāma sā”ti? “Mayhaṁ pajāpati aticarati, taṁ ghātessāmī”ti. “Jānāhī”ti. Assosi kho sā itthī— “sāmiko kira maṁ ghātetukāmo”ti. Varabhaṇḍaṁ ādāya sāvatthiṁ gantvā titthiye upasaṅkamitvā pabbajjaṁ yāci. Titthiyā na icchiṁsu pabbājetuṁ. Bhikkhuniyo upasaṅkamitvā pabbajjaṁ yāci. Bhikkhuniyopi na icchiṁsu pabbājetuṁ. Thullanandaṁ bhikkhuniṁ upasaṅkamitvā bhaṇḍakaṁ dassetvā pabbajjaṁ yāci. Thullanandā bhikkhunī bhaṇḍakaṁ gahetvā pabbājesi. Atha kho so licchavi taṁ itthiṁ gavesanto sāvatthiṁ gantvā bhikkhunīsu pabbajitaṁ disvāna yena rājā pasenadi kosalo tenupasaṅkami; upasaṅkamitvā rājānaṁ pasenadiṁ kosalaṁ etadavoca— “pajāpati me, deva, varabhaṇḍaṁ ādāya sāvatthiṁ anuppattā. Taṁ devo anujānātū”ti. “Tena hi, bhaṇe, vicinitvā ācikkhā”ti. “Diṭṭhā, deva, bhikkhunīsu pabbajitā”ti. “Sace, bhaṇe, bhikkhunīsu pabbajitā, na sā labbhā kiñci kātuṁ. Svākkhāto bhagavatā dhammo, caratu brahmacariyaṁ sammā dukkhassa antakiriyāyā”ti. Atha kho so licchavi ujjhāyati khiyyati vipāceti— “kathañhi nāma bhikkhuniyo coriṁ pabbājessantī”ti. Assosuṁ kho bhikkhuniyo tassa licchavissa ujjhāyantassa khiyyantassa vipācentassa. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma ayyā thullanandā coriṁ pabbājessatī”ti. Atha kho tā bhikkhuniyo bhikkhūnaṁ etamatthaṁ ārocesuṁ …pe… “saccaṁ kira, bhikkhave, thullanandā bhikkhunī coriṁ pabbājetī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, thullanandā bhikkhunī coriṁ pabbājessati. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī jānaṁ coriṁ vajjhaṁ viditaṁ anapaloketvā rājānaṁ vā saṅghaṁ vā gaṇaṁ vā pūgaṁ vā seṇiṁ vā aññatra kappā vuṭṭhāpeyya, ayampi bhikkhunī paṭhamāpattikaṁ dhammaṁ āpannā nissāraṇīyaṁ saṅghādisesan”ti.
Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Jānāti nāma sāmaṁ vā jānāti aññe vā tassā ārocenti, sā vā āroceti. Corī nāma yā pañcamāsakaṁ vā atirekapañcamāsakaṁ vā agghanakaṁ adinnaṁ theyyasaṅkhātaṁ ādiyati, esā corī nāma. Vajjhā nāma yaṁ katvā vajjhappattā hoti. Viditā nāma aññehi manussehi ñātā hoti “vajjhā esā”ti. Anapaloketvāti anāpucchā. Rājā nāma yattha rājā anusāsati, rājā apaloketabbo. Saṅgho nāma bhikkhunisaṅgho vuccati, bhikkhunisaṅgho apaloketabbo. Gaṇo nāma yattha gaṇo anusāsati, gaṇo apaloketabbo. Pūgo nāma yattha pūgo anusāsati, pūgo apaloketabbo. Seṇi nāma yattha seṇi anusāsati, seṇi apaloketabbo. Aññatra kappāti ṭhapetvā kappaṁ. Kappaṁ nāma dve kappāni— titthiyesu vā pabbajitā hoti aññāsu vā bhikkhunīsu pabbajitā. Aññatra kappā “vuṭṭhāpessāmī”ti gaṇaṁ vā ācariniṁ vā pattaṁ vā cīvaraṁ vā pariyesati, sīmaṁ vā sammannati, āpatti dukkaṭassa. Ñattiyā dukkaṭaṁ. Dvīhi kammavācāhi thullaccayā. Kammavācāpariyosāne upajjhāyāya āpatti saṅghādisesassa. Gaṇassa ca ācariniyā ca āpatti dukkaṭassa. Ayampīti purimaṁ upādāya vuccati. Paṭhamāpattikanti saha vatthujjhācārā āpajjati asamanubhāsanāya. Nissāraṇīyanti saṅghamhā nissārīyati. Saṅghādisesanti …pe… tenapi vuccati saṅghādisesoti. Coriyā corisaññā aññatra kappā vuṭṭhāpeti, āpatti saṅghādisesassa. Coriyā vematikā aññatra kappā vuṭṭhāpeti, āpatti dukkaṭassa. Coriyā acorisaññā aññatra kappā vuṭṭhāpeti, anāpatti. Acoriyā corisaññā, āpatti dukkaṭassa. Acoriyā vematikā, āpatti dukkaṭassa. Acoriyā acorisaññā, anāpatti. Anāpatti— ajānantī vuṭṭhāpeti, apaloketvā vuṭṭhāpeti, kappakataṁ vuṭṭhāpeti, ummattikāya, ādikammikāyāti. Dutiyasaṅghādisesasikkhāpadaṁ niṭṭhitaṁ.