← _

Theravāda Vinaya Mahāvibhaṅga

id: pli-tv-bu-vb-pc18 VRI: vol 88 สยามรัฐ: vol 2 56 segments
Theravāda Vinaya Mahāvibhaṅga Pācittiyakaṇḍa Bhūtagāmavagga 18. Vehāsakuṭisikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena dve bhikkhū saṅghike vihāre uparivehāsakuṭiyā eko heṭṭhā viharati, eko upari. Uparimo bhikkhu āhaccapādakaṁ mañcaṁ sahasā abhinisīdi. Mañcapādo nippatitvā heṭṭhimassa bhikkhuno matthake avatthāsi. So bhikkhu vissaramakāsi. Bhikkhū upadhāvitvā taṁ bhikkhuṁ etadavocuṁ— “kissa tvaṁ, āvuso, vissaramakāsī”ti? Atha kho so bhikkhu bhikkhūnaṁ etamatthaṁ ārocesi. Ye te bhikkhū appicchā …pe… te ujjhāyanti khiyyanti vipācenti— “kathañhi nāma bhikkhu saṅghike vihāre uparivehāsakuṭiyā āhaccapādakaṁ mañcaṁ sahasā abhinisīdissatī”ti. Atha kho te bhikkhū taṁ bhikkhuṁ anekapariyāyena vigarahitvā bhagavato etamatthaṁ ārocesuṁ …pe… “saccaṁ kira tvaṁ, bhikkhu, saṅghike vihāre uparivehāsakuṭiyā āhaccapādakaṁ mañcaṁ sahasā abhinisīdasī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, saṅghike vihāre uparivehāsakuṭiyā āhaccapādakaṁ mañcaṁ sahasā abhinisīdissasi. Netaṁ, moghapurisa, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu saṅghike vihāre uparivehāsakuṭiyā āhaccapādakaṁ mañcaṁ vā pīṭhaṁ vā abhinisīdeyya vā abhinipajjeyya vā, pācittiyan”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Saṅghiko nāma vihāro saṅghassa dinno hoti pariccatto. Vehāsakuṭi nāma majjhimassa purisassa asīsaghaṭṭā. Āhaccapādako nāma mañco aṅge vijjhitvā ṭhito hoti. Āhaccapādakaṁ nāma pīṭhaṁ aṅge vijjhitvā ṭhitaṁ hoti. Abhinisīdeyyāti tasmiṁ abhinisīdati, āpatti pācittiyassa. Abhinipajjeyyāti tasmiṁ abhinipajjati, āpatti pācittiyassa. Saṅghike saṅghikasaññī uparivehāsakuṭiyā āhaccapādakaṁ mañcaṁ vā pīṭhaṁ vā abhinisīdati vā abhinipajjati vā, āpatti pācittiyassa. Saṅghike vematiko …pe… saṅghike puggalikasaññī uparivehāsakuṭiyā āhaccapādakaṁ mañcaṁ vā pīṭhaṁ vā abhinisīdati vā abhinipajjati vā, āpatti pācittiyassa. Puggalike saṅghikasaññī, āpatti dukkaṭassa. Puggalike vematiko, āpatti dukkaṭassa. Puggalike puggalikasaññī aññassa puggalike, āpatti dukkaṭassa. Attano puggalike, anāpatti. Anāpatti— avehāsakuṭiyā sīsaghaṭṭāya heṭṭhā aparibhogaṁ hoti, padarasañcitaṁ hoti, paṭāṇi dinnā hoti, tasmiṁ ṭhito gaṇhati vā laggeti vā, ummattakassa, ādikammikassāti. Vehāsakuṭisikkhāpadaṁ niṭṭhitaṁ aṭṭhamaṁ.