← _

Theravāda Vinaya Mahāvibhaṅga

id: pli-tv-bu-vb-pc35 VRI: vol 88 สยามรัฐ: vol 2 92 segments
Theravāda Vinaya Mahāvibhaṅga Pācittiyakaṇḍa Bhojanavagga 35. Pavāraṇāsikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena aññataro brāhmaṇo bhikkhū nimantetvā bhojesi. Bhikkhū bhuttāvī pavāritā ñātikulāni gantvā ekacce bhuñjiṁsu ekacce piṇḍapātaṁ ādāya agamaṁsu. Atha kho so brāhmaṇo paṭivissake etadavoca— “bhikkhū mayā, ayyā, santappitā. Etha, tumhepi santappessāmī”ti. Te evamāhaṁsu—“kiṁ tvaṁ, ayyo, amhe santappessasi? Yepi tayā nimantitā tepi amhākaṁ gharāni āgantvā ekacce bhuñjiṁsu ekacce piṇḍapātaṁ ādāya agamaṁsū”ti. Atha kho so brāhmaṇo ujjhāyati khiyyati vipāceti— “kathañhi nāma bhadantā amhākaṁ ghare bhuñjitvā aññatra bhuñjissanti. Na cāhaṁ paṭibalo yāvadatthaṁ dātun”ti. Assosuṁ kho bhikkhū tassa brāhmaṇassa ujjhāyantassa khiyyantassa vipācentassa. Ye te bhikkhū appicchā …pe… te ujjhāyanti khiyyanti vipācenti— “kathañhi nāma bhikkhū bhuttāvī pavāritā aññatra bhuñjissantī”ti …pe… “saccaṁ kira, bhikkhave, bhikkhū bhuttāvī pavāritā aññatra bhuñjantī”ti? “Saccaṁ, bhagavā”ti. Vigarahi buddho bhagavā …pe… kathañhi nāma te, bhikkhave, moghapurisā bhuttāvī pavāritā aññatra bhuñjissanti. Netaṁ, bhikkhave, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu bhuttāvī pavārito khādanīyaṁ vā bhojanīyaṁ vā khādeyya vā bhuñjeyya vā, pācittiyan”ti. Evañcidaṁ bhagavatā bhikkhūnaṁ sikkhāpadaṁ paññattaṁ hoti.
Tena kho pana samayena bhikkhū gilānānaṁ bhikkhūnaṁ paṇīte piṇḍapāte nīharanti. Gilānā na cittarūpaṁ bhuñjanti. Tāni bhikkhū chaṭṭenti. Assosi kho bhagavā uccāsaddaṁ mahāsaddaṁ kākoravasaddaṁ. Sutvāna āyasmantaṁ ānandaṁ āmantesi— “kiṁ nu kho so, ānanda, uccāsaddo mahāsaddo kākoravasaddo”ti? Atha kho āyasmā ānando bhagavato etamatthaṁ ārocesi. “Bhuñjeyyuṁ panānanda, bhikkhū gilānātirittan”ti. “Na bhuñjeyyuṁ, bhagavā”ti. Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi— “anujānāmi, bhikkhave, gilānassa ca agilānassa ca atirittaṁ bhuñjituṁ. Evañca pana, bhikkhave, atirittaṁ kātabbaṁ— ‘alametaṁ sabban’ti. Evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu bhuttāvī pavārito anatirittaṁ khādanīyaṁ vā bhojanīyaṁ vā khādeyya vā bhuñjeyya vā, pācittiyan”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Bhuttāvī nāma pañcannaṁ bhojanānaṁ aññataraṁ bhojanaṁ antamaso kusaggenapi bhuttaṁ hoti. Pavārito nāma asanaṁ paññāyati, bhojanaṁ paññāyati, hatthapāse ṭhito abhiharati, paṭikkhepo paññāyati. Anatirittaṁ nāma akappiyakataṁ hoti, appaṭiggahitakataṁ hoti, anuccāritakataṁ hoti, ahatthapāse kataṁ hoti, abhuttāvinā kataṁ hoti, bhuttāvinā pavāritena āsanā vuṭṭhitena kataṁ hoti, “alametaṁ sabban”ti avuttaṁ hoti, na gilānātirittaṁ hoti— etaṁ anatirittaṁ nāma. Atirittaṁ nāma kappiyakataṁ hoti, paṭiggahitakataṁ hoti, uccāritakataṁ hoti, hatthapāse kataṁ hoti, bhuttāvinā kataṁ hoti, bhuttāvinā pavāritena āsanā avuṭṭhitena kataṁ hoti, “alametaṁ sabban”ti vuttaṁ hoti, gilānātirittaṁ hoti— etaṁ atirittaṁ nāma. Khādanīyaṁ nāma pañca bhojanāni—yāmakālikaṁ sattāhakālikaṁ yāvajīvikaṁ ṭhapetvā avasesaṁ khādanīyaṁ nāma. Bhojanīyaṁ nāma pañca bhojanāni— odano, kummāso, sattu, maccho, maṁsaṁ. “Khādissāmi bhuñjissāmī”ti paṭiggaṇhāti, āpatti dukkaṭassa ajjhohāre ajjhohāre āpatti pācittiyassa. Anatiritte anatirittasaññī khādanīyaṁ vā bhojanīyaṁ vā khādati vā bhuñjati vā, āpatti pācittiyassa. Anatiritte vematiko khādanīyaṁ vā bhojanīyaṁ vā khādati vā bhuñjati vā, āpatti pācittiyassa. Anatiritte atirittasaññī khādanīyaṁ vā bhojanīyaṁ vā khādati vā bhuñjati vā, āpatti pācittiyassa. Yāmakālikaṁ sattāhakālikaṁ yāvajīvikaṁ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Atiritte anatirittasaññī, āpatti dukkaṭassa. Atiritte vematiko, āpatti dukkaṭassa. Atiritte atirittasaññī, anāpatti. Anāpatti— atirittaṁ kārāpetvā bhuñjati, “atirittaṁ kārāpetvā bhuñjissāmī”ti paṭiggaṇhāti, aññassatthāya haranto gacchati, gilānassa sesakaṁ bhuñjati, yāmakālikaṁ sattāhakālikaṁ yāvajīvikaṁ sati paccaye paribhuñjati, ummattakassa, ādikammikassāti. Pavāraṇāsikkhāpadaṁ niṭṭhitaṁ pañcamaṁ.