← _

Theravāda Vinaya Mahāvibhaṅga

id: pli-tv-bu-vb-pc50 VRI: vol 88 สยามรัฐ: vol 2 56 segments
Theravāda Vinaya Mahāvibhaṅga Pācittiyakaṇḍa Acelakavagga 50. Uyyodhikasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū dirattatirattaṁ senāya vasamānā uyyodhikampi balaggampi senābyūhampi anīkadassanampi gacchanti. Aññataropi chabbaggiyo bhikkhu uyyodhikaṁ gantvā kaṇḍena paṭividdho hoti. Manussā taṁ bhikkhuṁ uppaṇḍesuṁ— “kacci, bhante, suyuddhaṁ ahosi, kati te lakkhāni laddhānī”ti? So bhikkhu tehi manussehi uppaṇḍiyamāno maṅku ahosi. Manussā ujjhāyanti khiyyanti vipācenti— “kathañhi nāma samaṇā sakyaputtiyā uyyodhikaṁ dassanāya āgacchissanti. Amhākampi alābhā, amhākampi dulladdhaṁ, ye mayaṁ ājīvassa hetu puttadārassa kāraṇā uyyodhikaṁ āgacchāmā”ti. Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ. Ye te bhikkhū appicchā …pe… te ujjhāyanti khiyyanti vipācenti— “kathañhi nāma chabbaggiyā bhikkhū uyyodhikaṁ dassanāya gacchissantī”ti …pe… “saccaṁ kira tumhe, bhikkhave, uyyodhikaṁ dassanāya gacchathā”ti? “Saccaṁ, bhagavā”ti. Vigarahi buddho bhagavā …pe… kathañhi nāma tumhe, moghapurisā, uyyodhikaṁ dassanāya gacchissatha. Netaṁ, moghapurisā, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Dirattatirattañce bhikkhu senāya vasamāno uyyodhikaṁ vā balaggaṁ vā senābyūhaṁ vā anīkadassanaṁ vā gaccheyya, pācittiyan”ti.
Dirattatirattañce bhikkhu senāya vasamānoti dvetisso rattiyo vasamāno. Uyyodhikaṁ nāma yattha sampahāro dissati. Balaggaṁ nāma ettakā hatthī, ettakā assā, ettakā rathā, ettakā pattī. Senābyūhaṁ nāma ito hatthī hontu, ito assā hontu, ito rathā hontu, ito pattikā hontu. Anīkaṁ nāma hatthānīkaṁ, assānīkaṁ, rathānīkaṁ, pattānīkaṁ. Tayo hatthī pacchimaṁ hatthānīkaṁ, tayo assā pacchimaṁ assānīkaṁ, tayo rathā pacchimaṁ rathānīkaṁ, cattāro purisā sarahatthā pattī pacchimaṁ pattānīkaṁ. Dassanāya gacchati, āpatti dukkaṭassa. Yattha ṭhito passati, āpatti pācittiyassa. Dassanūpacāraṁ vijahitvā punappunaṁ passati, āpatti pācittiyassa. Ekamekaṁ dassanāya gacchati, āpatti dukkaṭassa. Yattha ṭhito passati, āpatti dukkaṭassa. Dassanūpacāraṁ vijahitvā punappunaṁ passati, āpatti dukkaṭassa. Anāpatti— ārāme ṭhito passati, bhikkhussa ṭhitokāsaṁ vā nisinnokāsaṁ vā nipannokāsaṁ vā āgantvā sampahāro dissati, paṭipathaṁ gacchanto passati, sati karaṇīye gantvā passati, āpadāsu, ummattakassa, ādikammikassāti. Uyyodhikasikkhāpadaṁ niṭṭhitaṁ dasamaṁ. Acelakavaggo pañcamo. Tassuddānaṁ Pūvaṁ kathopanandassa, tayaṁpaṭṭhākameva ca; Mahānāmo pasenadi, senāviddho ime dasāti.