← _

Theravāda Vinaya Mahāvibhaṅga

id: pli-tv-bu-vb-pc52 VRI: vol 88 สยามรัฐ: vol 2 44 segments
Theravāda Vinaya Mahāvibhaṅga Pācittiyakaṇḍa Surāpānavagga 52. Aṅgulipatodakasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sattarasavaggiyaṁ bhikkhuṁ aṅgulipatodakena hāsesuṁ. So bhikkhu uttanto anassāsako kālamakāsi. Ye te bhikkhū appicchā …pe… te ujjhāyanti khiyyanti vipācenti— “kathañhi nāma chabbaggiyā bhikkhū bhikkhuṁ aṅgulipatodakena hāsessantī”ti …pe… “saccaṁ kira tumhe, bhikkhave, bhikkhuṁ aṅgulipatodakena hāsethā”ti? “Saccaṁ, bhagavā”ti. Vigarahi buddho bhagavā …pe… kathañhi nāma tumhe, moghapurisā, bhikkhuṁ aṅgulipatodakena hāsessatha. Netaṁ, moghapurisā, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Aṅgulipatodake pācittiyan”ti.
Aṅgulipatodako nāma upasampanno upasampannaṁ hasādhippāyo kāyena kāyaṁ āmasati, āpatti pācittiyassa. Upasampanne upasampannasaññī aṅgulipatodakena hāseti, āpatti pācittiyassa. Upasampanne vematiko aṅgulipatodakena hāseti, āpatti pācittiyassa. Upasampanne anupasampannasaññī aṅgulipatodakena hāseti, āpatti pācittiyassa. Kāyena kāyapaṭibaddhaṁ āmasati, āpatti dukkaṭassa. Kāyapaṭibaddhena kāyaṁ āmasati, āpatti dukkaṭassa. Kāyapaṭibaddhena kāyapaṭibaddhaṁ āmasati, āpatti dukkaṭassa. Nissaggiyena kāyaṁ āmasati, āpatti dukkaṭassa. Nissaggiyena kāyapaṭibaddhaṁ āmasati, āpatti dukkaṭassa. Nissaggiyena nissaggiyaṁ āmasati, āpatti dukkaṭassa. Anupasampannaṁ kāyena kāyaṁ āmasati, āpatti dukkaṭassa. Kāyena kāyapaṭibaddhaṁ āmasati, āpatti dukkaṭassa. Kāyapaṭibaddhena kāyaṁ āmasati, āpatti dukkaṭassa. Kāyapaṭibaddhena kāyapaṭibaddhaṁ āmasati, āpatti dukkaṭassa. Nissaggiyena kāyaṁ āmasati, āpatti dukkaṭassa. Nissaggiyena kāyapaṭibaddhaṁ āmasati, āpatti dukkaṭassa. Nissaggiyena nissaggiyaṁ āmasati, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa. Anāpatti— na hasādhippāyo, sati karaṇīye āmasati, ummattakassa, ādikammikassāti. Aṅgulipatodakasikkhāpadaṁ niṭṭhitaṁ dutiyaṁ.