Theravāda Vinaya Mahāvibhaṅga
id: pli-tv-bu-vb-pc54 VRI: vol 88 สยามรัฐ: vol 2 41 segments
Theravāda Vinaya Mahāvibhaṅga Pācittiyakaṇḍa Surāpānavagga 54. Anādariyasikkhāpada
Tena samayena buddho bhagavā kosambiyaṁ viharati ghositārāme. vri:88.153 · sya:2.391 Tena kho pana samayena āyasmā channo anācāraṁ ācarati. Bhikkhū evamāhaṁsu— “māvuso channa, evarūpaṁ akāsi. Netaṁ kappatī”ti. So anādariyaṁ paṭicca karotiyeva. Ye te bhikkhū appicchā …pe… te ujjhāyanti khiyyanti vipācenti— “kathañhi nāma āyasmā channo anādariyaṁ karissatī”ti …pe… “saccaṁ kira tvaṁ, channa, anādariyaṁ karosī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, anādariyaṁ karissasi. Netaṁ, moghapurisa, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Anādariye pācittiyan”ti.
Anādariyaṁ nāma dve anādariyāni— puggalānādariyañca dhammānādariyañca. Puggalānādariyaṁ nāma upasampannena paññattena vuccamāno— “ayaṁ ukkhittako vā vambhito vā garahito vā, imassa vacanaṁ akataṁ bhavissatī”ti anādariyaṁ karoti, āpatti pācittiyassa. Dhammānādariyaṁ nāma upasampannena paññattena vuccamāno— “kathāyaṁ nasseyya vā vinasseyya vā antaradhāyeyya vā”, taṁ vā na sikkhitukāmo anādariyaṁ karoti, āpatti pācittiyassa. Upasampanne upasampannasaññī anādariyaṁ karoti, āpatti pācittiyassa. sya:2.392 Upasampanne vematiko anādariyaṁ karoti, āpatti pācittiyassa. Upasampanne anupasampannasaññī anādariyaṁ karoti, āpatti pācittiyassa. Apaññattena vuccamāno— vri:88.154 “idaṁ na sallekhāya na dhutatthāya na pāsādikatāya na apacayāya na vīriyārambhāya saṁvattatī”ti anādariyaṁ karoti, āpatti dukkaṭassa. Anupasampannena paññattena vā apaññattena vā vuccamāno— “idaṁ na sallekhāya na dhutatthāya na pāsādikatāya na apacayāya na vīriyārambhāya saṁvattatī”ti anādariyaṁ karoti, āpatti dukkaṭassa. Anupasampanne upasampannasaññī āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa. Anāpatti— “evaṁ amhākaṁ ācariyānaṁ uggaho paripucchā”ti bhaṇati, ummattakassa, ādikammikassāti. Anādariyasikkhāpadaṁ niṭṭhitaṁ catutthaṁ.