← _

Theravāda Vinaya Mahāvibhaṅga

id: pli-tv-bu-vb-pc59 VRI: vol 88 สยามรัฐ: vol 2 60 segments
Theravāda Vinaya Mahāvibhaṅga Pācittiyakaṇḍa Surāpānavagga 59. Vikappanasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena āyasmā upanando sakyaputto bhātuno saddhivihārikassa bhikkhuno sāmaṁ cīvaraṁ vikappetvā appaccuddhāraṇaṁ paribhuñjati. Atha kho so bhikkhu bhikkhūnaṁ etamatthaṁ ārocesi— “ayaṁ, āvuso, āyasmā upanando sakyaputto mayhaṁ cīvaraṁ sāmaṁ vikappetvā appaccuddhāraṇaṁ paribhuñjatī”ti. Ye te bhikkhū appicchā …pe… te ujjhāyanti khiyyanti vipācenti— “kathañhi nāma āyasmā upanando sakyaputto bhikkhussa sāmaṁ cīvaraṁ vikappetvā appaccuddhāraṇaṁ paribhuñjissatī”ti …pe… “saccaṁ kira tvaṁ, upananda, bhikkhussa sāmaṁ cīvaraṁ vikappetvā appaccuddhāraṇaṁ paribhuñjasī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, bhikkhussa sāmaṁ cīvaraṁ vikappetvā appaccuddhāraṇaṁ paribhuñjissasi. Netaṁ, moghapurisa, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṁ cīvaraṁ vikappetvā appaccuddhāraṇaṁ paribhuñjeyya, pācittiyan”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Bhikkhussāti aññassa bhikkhussa. Bhikkhunī nāma ubhatosaṅghe upasampannā. Sikkhamānā nāma dve vassāni chasu dhammesu sikkhitasikkhā. Sāmaṇero nāma dasasikkhāpadiko. Sāmaṇerī nāma dasasikkhāpadikā. Sāmanti sayaṁ vikappetvā. Cīvaraṁ nāma channaṁ cīvarānaṁ aññataraṁ cīvaraṁ vikappanupagaṁ pacchimaṁ. Vikappanā nāma dve vikappanā— sammukhāvikappanā ca parammukhāvikappanā ca. Sammukhāvikappanā nāma “imaṁ cīvaraṁ tuyhaṁ vikappemi itthannāmassa vā”ti. Parammukhāvikappanā nāma “imaṁ cīvaraṁ vikappanatthāya tuyhaṁ dammī”ti. Tena vattabbo— “ko te mitto vā sandiṭṭho vā”ti? “Itthannāmo ca itthannāmo cā”ti. Tena vattabbo— “ahaṁ tesaṁ dammi, tesaṁ santakaṁ paribhuñja vā vissajjehi vā yathāpaccayaṁ vā karohī”ti. Appaccuddhāraṇaṁ nāma tassa vā adinnaṁ, tassa vā avissasanto paribhuñjati, āpatti pācittiyassa. Appaccuddhāraṇe appaccuddhāraṇasaññī paribhuñjati, āpatti pācittiyassa. Appaccuddhāraṇe vematiko paribhuñjati, āpatti pācittiyassa. Appaccuddhāraṇe appaccuddhāraṇasaññī paribhuñjati, āpatti pācittiyassa. Adhiṭṭheti vā vissajjeti vā, āpatti dukkaṭassa. Paccuddhāraṇe appaccuddhāraṇasaññī, āpatti dukkaṭassa. Paccuddhāraṇe vematiko, āpatti dukkaṭassa. Paccuddhāraṇe paccuddhāraṇasaññī, anāpatti. Anāpatti— so vā deti, tassa vā vissasanto paribhuñjati, ummattakassa, ādikammikassāti. Vikappanasikkhāpadaṁ niṭṭhitaṁ navamaṁ.