← _

Theravāda Vinaya Mahāvibhaṅga

id: pli-tv-bu-vb-pc66 VRI: vol 88 สยามรัฐ: vol 2 57 segments
Theravāda Vinaya Mahāvibhaṅga Pācittiyakaṇḍa Sappāṇakavagga 66. Theyyasatthasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena aññataro sattho rājagahā paṭiyālokaṁ gantukāmo hoti. Aññataro bhikkhu te manusse etadavoca— “ahampāyasmantehi saddhiṁ gamissāmī”ti. “Mayaṁ kho, bhante, suṅkaṁ pariharissāmā”ti. “Pajānāthāvuso”ti. Assosuṁ kho kammiyā— “sattho kira suṅkaṁ pariharissatī”ti. Te magge pariyuṭṭhiṁsu. Atha kho te kammiyā taṁ satthaṁ gahetvā acchinditvā taṁ bhikkhuṁ etadavocuṁ— “kissa tvaṁ, bhante, jānaṁ theyyasatthena saddhiṁ gacchasī”ti? Palibundhetvā muñciṁsu. Atha kho so bhikkhu sāvatthiṁ gantvā bhikkhūnaṁ etamatthaṁ ārocesi. Ye te bhikkhū appicchā …pe… te ujjhāyanti khiyyanti vipācenti— “kathañhi nāma bhikkhu jānaṁ theyyasatthena saddhiṁ saṁvidhāya ekaddhānamaggaṁ paṭipajjissatī”ti …pe… “saccaṁ kira tvaṁ, bhikkhu, jānaṁ theyyasatthena saddhiṁ saṁvidhāya ekaddhānamaggaṁ paṭipajjasī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, jānaṁ theyyasatthena saddhiṁ saṁvidhāya ekaddhānamaggaṁ paṭipajjissasi. Netaṁ, moghapurisa, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu jānaṁ theyyasatthena saddhiṁ saṁvidhāya ekaddhānamaggaṁ paṭipajjeyya, antamaso gāmantarampi, pācittiyan”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Jānāti nāma sāmaṁ vā jānāti, aññe vā tassa ārocenti, so vā āroceti. Theyyasattho nāma corā katakammā vā honti akatakammā vā, rājānaṁ vā theyyaṁ gacchanti suṅkaṁ vā pariharanti. Saddhinti ekato. Saṁvidhāyāti— “gacchāmāvuso, gacchāma, bhante; gacchāma, bhante, gacchāmāvuso, ajja vā hiyyo vā pare vā gacchāmā”ti saṁvidahati, āpatti dukkaṭassa. Antamaso gāmantarampīti kukkuṭasampāte gāme gāmantare gāmantare āpatti pācittiyassa. Agāmake araññe addhayojane addhayojane āpatti pācittiyassa. Theyyasatthe theyyasatthasaññī saṁvidhāya ekaddhānamaggaṁ paṭipajjati, antamaso gāmantarampi, āpatti pācittiyassa. Theyyasatthe vematiko saṁvidhāya ekaddhānamaggaṁ paṭipajjati, antamaso gāmantarampi, āpatti dukkaṭassa. Theyyasatthe atheyyasatthasaññī saṁvidhāya ekaddhānamaggaṁ paṭipajjati, antamaso gāmantarampi, anāpatti. Bhikkhu saṁvidahati, manussā na saṁvidahanti, āpatti dukkaṭassa. Atheyyasatthe theyyasatthasaññī, āpatti dukkaṭassa. Atheyyasatthe vematiko, āpatti dukkaṭassa. Atheyyasatthe atheyyasatthasaññī anāpatti. Anāpatti— asaṁvidahitvā gacchati, manussā saṁvidahanti bhikkhu na saṁvidahati, visaṅketena gacchati, āpadāsu, ummattakassa, ādikammikassāti. Theyyasatthasikkhāpadaṁ niṭṭhitaṁ chaṭṭhaṁ.