← _

Theravāda Vinaya Mahāvibhaṅga

id: pli-tv-bu-vb-pc78 VRI: vol 88 สยามรัฐ: vol 2 53 segments
Theravāda Vinaya Mahāvibhaṅga Pācittiyakaṇḍa Sahadhammikavagga 78. Upassutisikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū pesalehi bhikkhūhi saddhiṁ bhaṇḍanti. Pesalā bhikkhū evaṁ vadanti— “alajjino ime, āvuso, chabbaggiyā bhikkhū. Na sakkā imehi saha bhaṇḍitun”ti. Chabbaggiyā bhikkhū evaṁ vadanti— “kissa tumhe, āvuso, amhe alajjivādena pāpethā”ti? “Kahaṁ pana tumhe, āvuso, assutthā”ti? “Mayaṁ āyasmantānaṁ upassutiṁ tiṭṭhamhā”ti. Ye te bhikkhū appicchā …pe… te ujjhāyanti khiyyanti vipācenti— “kathañhi nāma chabbaggiyā bhikkhū bhikkhūnaṁ bhaṇḍanajātānaṁ kalahajātānaṁ vivādāpannānaṁ upassutiṁ tiṭṭhissantī”ti …pe… “saccaṁ kira tumhe, bhikkhave, bhikkhūnaṁ bhaṇḍanajātānaṁ kalahajātānaṁ vivādāpannānaṁ upassutiṁ tiṭṭhathā”ti? “Saccaṁ, bhagavā”ti. Vigarahi buddho bhagavā …pe… kathañhi nāma tumhe, moghapurisā, bhikkhūnaṁ bhaṇḍanajātānaṁ kalahajātānaṁ vivādāpannānaṁ upassutiṁ tiṭṭhissatha. Netaṁ, moghapurisā, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu bhikkhūnaṁ bhaṇḍanajātānaṁ kalahajātānaṁ vivādāpannānaṁ upassutiṁ tiṭṭheyya—‘yaṁ ime bhaṇissanti taṁ sossāmī’ti etadeva paccayaṁ karitvā anaññaṁ, pācittiyan”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Bhikkhūnanti aññesaṁ bhikkhūnaṁ. Bhaṇḍanajātānaṁ kalahajātānaṁ vivādāpannānanti adhikaraṇajātānaṁ. Upassutiṁ tiṭṭheyyāti “imesaṁ sutvā codessāmi sāressāmi paṭicodessāmi paṭisāressāmi maṅkū karissāmī”ti gacchati, āpatti dukkaṭassa. Yattha ṭhito suṇāti, āpatti pācittiyassa. Pacchato gacchanto turito gacchati sossāmīti, āpatti dukkaṭassa. Yattha ṭhito suṇāti, āpatti pācittiyassa. Purato gacchanto ohiyyati sossāmīti, āpatti dukkaṭassa. Yattha ṭhito suṇāti, āpatti pācittiyassa. Bhikkhussa ṭhitokāsaṁ vā nisinnokāsaṁ vā nipannokāsaṁ vā āgantvā mantentaṁ ukkāsitabbaṁ, vijānāpetabbaṁ, no ce ukkāseyya vā vijānāpeyya vā, āpatti pācittiyassa. Etadeva paccayaṁ karitvā anaññanti na añño koci paccayo hoti upassutiṁ tiṭṭhituṁ. Upasampanne upasampannasaññī upassutiṁ tiṭṭhati, āpatti pācittiyassa. Upasampanne vematiko upassutiṁ tiṭṭhati, āpatti pācittiyassa. Upasampanne anupasampannasaññī upassutiṁ tiṭṭhati, āpatti pācittiyassa. Anupasampannassa upassutiṁ tiṭṭhati, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa. Anāpatti— “imesaṁ sutvā oramissāmi viramissāmi vūpasamissāmi attānaṁ parimocessāmī”ti gacchati, ummattakassa, ādikammikassāti. Upassutisikkhāpadaṁ niṭṭhitaṁ aṭṭhamaṁ.