Theravāda Vinaya Mahāvibhaṅga
id: pli-tv-bu-vb-sk4 20 segments
Theravāda Vinaya Mahāvibhaṅga Sekhiyakaṇḍa Parimaṇḍalavagga 4. Dutiyasuppaṭicchannasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū kāyaṁ vivaritvā antaraghare nisīdanti …pe…. “Suppaṭicchanno antaraghare nisīdissāmīti sikkhā karaṇīyā”ti. Suppaṭicchannena antaraghare nisīditabbaṁ. Yo anādariyaṁ paṭicca kāyaṁ vivaritvā antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Catutthasikkhāpadaṁ niṭṭhitaṁ.