← _

Theravāda Vinaya Mahāvibhaṅga

id: pli-tv-bu-vb-sk51 VRI: vol 88 สยามรัฐ: vol 2 30 segments
Theravāda Vinaya Mahāvibhaṅga Sekhiyakaṇḍa Surusuruvagga 51. Surusurukārakasikkhāpada
Tena samayena buddho bhagavā kosambiyaṁ viharati ghositārāme. Tena kho pana samayena aññatarena brāhmaṇena saṅghassa payopānaṁ paṭiyattaṁ hoti. Bhikkhū surusurukārakaṁ khīraṁ pivanti. Aññataro naṭapubbako bhikkhu evamāha— “sabboyaṁ maññe saṅgho sītīkato”ti. Ye te bhikkhū appicchā …pe… te ujjhāyanti khiyyanti vipācenti— “kathañhi nāma bhikkhu saṅghaṁ ārabbha davaṁ karissatī”ti …pe… “saccaṁ kira tvaṁ, bhikkhu, saṅghaṁ ārabbha davaṁ akāsī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, saṅghaṁ ārabbha davaṁ karissasi. Netaṁ, moghapurisa, appasannānaṁ vā pasādāya …pe… vigarahitvā …pe… dhammiṁ kathaṁ katvā bhikkhū āmantesi— “na, bhikkhave, buddhaṁ vā dhammaṁ vā saṅghaṁ vā ārabbha davo kātabbo. Yo kareyya, āpatti dukkaṭassā”ti. Atha kho bhagavā taṁ bhikkhuṁ anekapariyāyena vigarahitvā dubbharatāya …pe… evañca pana, bhikkhave, imaṁ sikkhāpadaṁ uddiseyyātha— “Na surusurukārakaṁ bhuñjissāmīti sikkhā karaṇīyā”ti. Na surusurukārakaṁ bhuñjitabbaṁ. Yo anādariyaṁ paṭicca surusurukārakaṁ bhuñjati, āpatti dukkaṭassa. Anāpatti— asañcicca …pe… ādikammikassāti. Paṭhamasikkhāpadaṁ niṭṭhitaṁ.