Theravāda Vinaya Mahāvibhaṅga
id: pli-tv-bu-vb-sk71 14 segments
Theravāda Vinaya Mahāvibhaṅga Sekhiyakaṇḍa Pādukavagga 71. Pacchatogamanasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū pacchato gacchantā purato gacchantassa dhammaṁ desenti …pe…. “Na pacchato gacchanto purato gacchantassa agilānassa dhammaṁ desessāmīti sikkhā karaṇīyā”ti. Na pacchato gacchantena purato gacchantassa agilānassa dhammo desetabbo. Yo anādariyaṁ paṭicca pacchato gacchanto purato gacchantassa agilānassa dhammaṁ deseti, āpatti dukkaṭassa. Anāpatti— asañcicca …pe… ādikammikassāti. Ekādasamasikkhāpadaṁ niṭṭhitaṁ.