Saṁyutta Nikāya 45.37 4. Paṭipattivagga

id: sn45.37 สยามรัฐ: vol 19 14 segments

Saṁyutta Nikāya 45.37 4. Paṭipattivagga Paṭhamabrahmaññasutta

Sāvatthinidānaṁ. sya:19.31 “Brahmaññañca vo, bhikkhave, desessāmi, brahmaññaphalāni ca. Taṁ suṇātha. Katamañca kho, bhikkhave, brahmaññaṁ? Ayameva ariyo aṭṭhaṅgiko maggo, seyyathidaṁ— sammādiṭṭhi …pe… sammāsamādhi. Idaṁ vuccati, bhikkhave, brahmaññaṁ. Katamāni ca, bhikkhave, brahmaññaphalāni? Sotāpattiphalaṁ, sakadāgāmiphalaṁ, anāgāmiphalaṁ, arahattaphalaṁ— imāni vuccanti, bhikkhave, brahmaññaphalānī”ti. Sattamaṁ.