Therāpadāna Sobhitavagga
id: tha-ap133 VRI: vol 57 สยามรัฐ: vol 32 41 segments
Therāpadāna Sobhitavagga Sobhitattheraapadāna
“Padumuttaro nāma jino, vri:57.166 · sya:32.236 lokajeṭṭho narāsabho; Mahato janakāyassa, deseti amataṁ padaṁ.
Tassāhaṁ vacanaṁ sutvā, vācāsabhimudīritaṁ; Añjaliṁ paggahetvāna, ekaggo āsahaṁ tadā.
‘Yathā samuddo udadhīnamaggo, Nerū nagānaṁ pavaro siluccayo; Tatheva ye cittavasena vattare’, Na buddhañāṇassa kalaṁ upenti te.
Dhammavidhiṁ ṭhapetvāna, buddho kāruṇiko isi; Bhikkhusaṅghe nisīditvā, imā gāthā abhāsatha.
‘Yo so ñāṇaṁ pakittesi, buddhamhi lokanāyake; Kappānaṁ satasahassaṁ, duggatiṁ na gamissati.
Kilese jhāpayitvāna, ekaggo susamāhito; Sobhito nāma nāmena, hessati satthu sāvako’.
Paññāse kappasahasse, sya:32.237 sattevāsuṁ yasuggatā; Sattaratanasampannā, cakkavattī mahabbalā.
Kilesā jhāpitā mayhaṁ, bhavā sabbe samūhatā; Tisso vijjā anuppattā, kataṁ buddhassa sāsanaṁ.
Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.
Itthaṁ sudaṁ āyasmā sobhito thero imā gāthāyo abhāsitthāti.
Sobhitattherassāpadānaṁ paṭhamaṁ.