Therāpadāna Sīhāsaniyavagga
id: tha-ap14 VRI: vol 57 สยามรัฐ: vol 32 61 segments
Therāpadāna Sīhāsaniyavagga Ekatthambhikattheraapadāna
“Siddhatthassa bhagavato, sya:32.79 mahāpūgagaṇo ahu; Saraṇaṁ gatā ca te buddhaṁ, saddahanti tathāgataṁ.
Sabbe saṅgamma mantetvā, māḷaṁ kubbanti satthuno; Ekatthambhaṁ alabhantā, vicinanti brahāvane.
Tehaṁ araññe disvāna, upagamma gaṇaṁ tadā; Añjaliṁ paggahetvāna, paripucchiṁ gaṇaṁ ahaṁ.
Te me puṭṭhā viyākaṁsu, sīlavanto upāsakā; Māḷaṁ mayaṁ kattukāmā, ekatthambho na labbhati.
Ekatthambhaṁ mamaṁ detha, ahaṁ dassāmi satthuno; Āharissāmahaṁ thambhaṁ, appossukkā bhavantu te.
Te me thambhaṁ pavecchiṁsu, pasannā tuṭṭhamānasā; Tato paṭinivattitvā, agamaṁsu sakaṁ gharaṁ.
Aciraṁ gate pūgagaṇe, thambhaṁ ahāsahaṁ tadā; Haṭṭho haṭṭhena cittena, paṭhamaṁ ussapesahaṁ.
Tena cittappasādena, Vimānaṁ upapajjahaṁ; Ubbiddhaṁ bhavanaṁ mayhaṁ, Sattabhūmaṁ samuggataṁ.
Vajjamānāsu bherīsu, paricāremahaṁ sadā; Pañcapaññāsakappamhi, rājā āsiṁ yasodharo.
Tatthāpi bhavanaṁ mayhaṁ, sya:32.80 sattabhūmaṁ samuggataṁ; Kūṭāgāravarūpetaṁ, ekatthambhaṁ manoramaṁ.
Ekavīsatikappamhi, udeno nāma khattiyo; Tatrāpi bhavanaṁ mayhaṁ, sattabhūmaṁ samuggataṁ.
Yaṁ yaṁ yonupapajjāmi, vri:57.54 devattaṁ atha mānusaṁ; Anubhomi sukhaṁ sabbaṁ, ekatthambhassidaṁ phalaṁ.
Catunnavutito kappe, yaṁ thambhamadadaṁ tadā; Duggatiṁ nābhijānāmi, ekatthambhassidaṁ phalaṁ.
Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.
Itthaṁ sudaṁ āyasmā ekatthambhiko thero imā gāthāyo abhāsitthāti.
Ekatthambhikattherassāpadānaṁ dutiyaṁ.