Therāpadāna Thomakavagga

id: tha-ap262 VRI: vol 57 สยามรัฐ: vol 32 32 segments

Therāpadāna Thomakavagga Aggapupphiyattheraapadāna

“Suvaṇṇavaṇṇaṁ sambuddhaṁ, vri:57.243 · sya:32.347 Nisinnaṁ pabbatantare; Obhāsayantaṁ raṁsena, Sikhinaṁ sikhinaṁ yathā.

Aggajaṁ pupphamādāya, upāgacchiṁ naruttamaṁ; Pasannacitto sumano, buddhassa abhiropayiṁ.

Ekattiṁse ito kappe, yaṁ pupphamabhipūjayiṁ; Duggatiṁ nābhijānāmi, buddhapūjāyidaṁ phalaṁ.

Pañcavīsatikappamhi, ahosi amitogato; Sattaratanasampanno, cakkavattī mahabbalo.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā aggapupphiyo thero imā gāthāyo abhāsitthāti.

Aggapupphiyattherassāpadānaṁ dasamaṁ.

Thomakavaggo chabbīsatimo.

Tassuddānaṁ

Thomakekāsanacitakaṁ, sya:32.348 campako sattapāṭali; Pānadhi mañjarī paṇṇaṁ, kuṭido aggapupphiyo; Gāthāyo gaṇitā cettha, ekatālīsameva cāti.