← _

Therāpadāna Pilindavacchavagga

id: tha-ap393 VRI: vol 57 สยามรัฐ: vol 32 906 segments
Therāpadāna Pilindavacchavagga Pilindavacchattheraapadāna
“Nagare haṁsavatiyā, āsiṁ dovāriko ahaṁ; Akkhobhaṁ amitaṁ bhogaṁ, ghare sannicitaṁ mama.
Rahogato nisīditvā, pahaṁsitvāna mānasaṁ; Nisajja pāsādavare, evaṁ cintesahaṁ tadā.
1.1. Cintanākāra ‘Bahū medhigatā bhogā, phītaṁ antepuraṁ mama; Rājāpi sannimantesi, ānando pathavissaro.
Ayañca buddho uppanno, adhiccuppattiko muni; Saṁvijjanti ca me bhogā, dānaṁ dassāmi satthuno.
Padumena rājaputtena, dinnaṁ dānavaraṁ jine; Hatthināge ca pallaṅke, apassenañcanappakaṁ.
Ahampi dānaṁ dassāmi, saṅghe gaṇavaruttame; Adinnapubbamaññesaṁ, bhavissaṁ ādikammiko.
Cintetvāhaṁ bahuvidhaṁ, yāge yassa sukhaṁphalaṁ; Parikkhāradānamaddakkhiṁ, mama saṅkappapūraṇaṁ.
Parikkhārāni dassāmi, saṅghe gaṇavaruttame; Adinnapubbamaññesaṁ, bhavissaṁ ādikammiko’.
1.2. Dānavatthusampādana Naḷakāre upāgamma, chattaṁ kāresi tāvade; Chattasatasahassāni, ekato sannipātayiṁ.
Dussasatasahassāni, ekato sannipātayiṁ; Pattasatasahassāni, ekato sannipātayiṁ.
Vāsiyo satthake cāpi, sūciyo nakhachedane; Heṭṭhāchatte ṭhapāpesiṁ, kāretvā tadanucchave.
Vidhūpane tālavaṇṭe, morahatthe ca cāmare; Parissāvane teladhāre, kārayiṁ tadanucchave.
Sūcighare aṁsabaddhe, athopi kāyabandhane; Ādhārake ca sukate, kārayiṁ tadanucchave.
Paribhogabhājane ca, athopi lohathālake; Bhesajje pūrayitvāna, heṭṭhāchatte ṭhapesahaṁ.
Vacaṁ usīraṁ laṭṭhimadhuṁ, pipphalī maricāni ca; Harītakiṁ siṅgīveraṁ, sabbaṁ pūresi bhājane.
Upāhanā pādukāyo, atho udakapuñchane; Kattaradaṇḍe sukate, kārayiṁ tadanucchave.
Osadhañjananāḷī ca, salākā dhammakuttarā; Kuñcikā pañcavaṇṇehi, sibbite kuñcikāghare.
Āyoge dhūmanette ca, athopi dīpadhārake; Tumbake ca karaṇḍe ca, kārayiṁ tadanucchave.
Saṇḍāse pipphale ceva, athopi malahārake; Bhesajjathavike ceva, kārayiṁ tadanucchave.
Āsandiyo pīṭhake ca, pallaṅke caturomaye; Tadanucchave kārayitvā, heṭṭhāchatte ṭhapesahaṁ.
Uṇṇābhisī tūlabhisī, athopi pīṭhikābhisī; Bimbohane ca sukate, kārayiṁ tadanucchave.
Kuruvinde madhusitthe, telaṁ hatthappatāpakaṁ; Sipāṭiphalake sucī, mañcaṁ attharaṇena ca.
Senāsane pādapuñche, sayanāsanadaṇḍake; Dantapoṇe ca āṭalī, sīsālepanagandhake.
Araṇī phalapīṭhe ca, pattapidhānathālake; Udakassa kaṭacchū ca, cuṇṇakaṁ rajanambaṇaṁ.
Sammajjanaṁ udapattaṁ, tathā vassikasāṭikaṁ; Nisīdanaṁ kaṇḍucchādi, atha antaravāsakaṁ.
Uttarāsaṅgasaṅghāṭī, natthukaṁ mukhasodhanaṁ; Biḷaṅgaloṇaṁ pahūtañca, madhuñca dadhipānakaṁ.
Dhūpaṁ sitthaṁ pilotiñca, mukhapuñchanasuttakaṁ; Dātabbaṁ nāma yaṁ atthi, yañca kappati satthuno.
Sabbametaṁ samānetvā, ānandaṁ upasaṅkamiṁ; Upasaṅkamma rājānaṁ, janetāraṁ mahesino; Sirasā abhivādetvā, idaṁ vacanamabraviṁ.
1.3. Dānokāsayācanā ‘Ekato jātasaṁvaddhā, ubhinnaṁ ekato manaṁ; Sādhāraṇā sukhadukkhe, ubho ca anuvattakā.
Atthi cetasikaṁ dukkhaṁ, tavādheyyaṁ arindama; Yadi sakkosi taṁ dukkhaṁ, vinodeyyāsi khattiya’.
‘Tava dukkhaṁ mama dukkhaṁ, Ubhinnaṁ ekato mano; Niṭṭhitanti vijānāhi, Mamādheyyaṁ sace tuvaṁ’.
‘Jānāhi kho mahārāja, dukkhaṁ me dubbinodayaṁ; Pahu samāno gajjasu, ekaṁ te duccajaṁ varaṁ.
Yāvatā vijite atthi, yāvatā mama jīvitaṁ; Etehi yadi te attho, dassāmi avikampito.
Gajjitaṁ kho tayā deva, micchā taṁ bahu gajjitaṁ; Jānissāmi tuvaṁ ajja, sabbadhamme patiṭṭhitaṁ’.
‘Atibāḷhaṁ nipīḷesi, dadamānassa me sato; Kiṁ te me pīḷitenattho, patthitaṁ te kathehi me’.
‘Icchāmahaṁ mahārāja, buddhaseṭṭhaṁ anuttaraṁ; Bhojayissāmi sambuddhaṁ, vajjaṁ me māhu jīvitaṁ’.
‘Aññaṁ tehaṁ varaṁ dammi, mā yācittho tathāgataṁ; Adeyyo kassaci buddho, maṇi jotiraso yathā’.
‘Nanu te gajjitaṁ deva, yāva jīvitamattano; Jīvitaṁ dadamānena, yuttaṁ dātuṁ tathāgataṁ’.
‘Ṭhapanīyo mahāvīro, adeyyo kassaci jino; Na me paṭissuto buddho, varassu amitaṁ dhanaṁ’.
‘Vinicchayaṁ pāpuṇāma, pucchissāma vinicchaye; Yathāsaṇṭhaṁ kathessanti, paṭipucchāma taṁ tathā’.
Rañño hatthe gahetvāna, agamāsiṁ vinicchayaṁ; Purato akkhadassānaṁ, idaṁ vacanamabraviṁ.
‘Suṇantu me akkhadassā, rājā varamadāsi me; Na kiñci ṭhapayitvāna, jīvitampi pavārayi.
Tassa me varadinnassa, buddhaseṭṭhaṁ variṁ ahaṁ; Sudinno hoti me buddho, chindatha saṁsayaṁ mama’.
‘Sossāma tava vacanaṁ, bhūmipālassa rājino; Ubhinnaṁ vacanaṁ sutvā, chindissāmettha saṁsayaṁ.
Sabbaṁ deva tayā dinnaṁ, imassa sabbagāhikaṁ; Na kiñci ṭhapayitvāna, jīvitampi pavārayi’.
‘Kicchappattova hutvāna, yācī varamanuttaraṁ; Imaṁ sudukkhitaṁ ñatvā, adāsiṁ sabbagāhikaṁ’.
‘Parājayo tuvaṁ deva, assa deyyo tathāgato; Ubhinnaṁ saṁsayo chinno, yathāsaṇṭhamhi tiṭṭhatha’.
Rājā tattheva ṭhatvāna, akkhadassetadabravi; ‘Sammā mayhampi deyyātha, puna buddhaṁ labhāmahaṁ’.
‘Pūretvā tava saṅkappaṁ, bhojayitvā tathāgataṁ; Puna deyyāsi sambuddhaṁ, ānandassa yasassino’.
1.4. Nimantanakathā Akkhadassebhivādetvā, ānandañcāpi khattiyaṁ; Tuṭṭho pamudito hutvā, sambuddhamupasaṅkamiṁ.
Upasaṅkamma sambuddhaṁ, oghatiṇṇamanāsavaṁ; Sirasā abhivādetvā, idaṁ vacanamabraviṁ.
‘Vasīsatasahassehi, adhivāsehi cakkhuma; Hāsayanto mama cittaṁ, nivesanamupehi me’.
Padumuttaro lokavidū, āhutīnaṁ paṭiggaho; Mama saṅkappamaññāya, adhivāsesi cakkhumā.
Adhivāsanamaññāya, abhivādiya satthuno; Haṭṭho udaggacittohaṁ, nivesanamupāgamiṁ.
1.5. Dānapaṭiyādana Mittāmacce samānetvā, idaṁ vacanamabraviṁ; ‘Sudullabho mayā laddho, maṇi jotiraso yathā.
Kena taṁ pūjayissāma, appameyyo anūpamo; Atulo asamo dhīro, jino appaṭipuggalo.
Tathāsamasamo ceva, adutiyo narāsabho; Dukkaraṁ adhikārañhi, buddhānucchavikaṁ mayā.
Nānāpupphe samānetvā, karoma pupphamaṇḍapaṁ; Buddhānucchavikaṁ etaṁ, sabbapūjā bhavissati’.
Uppalaṁ padumaṁ vāpi, vassikaṁ adhimuttakaṁ; Campakaṁ nāgapupphañca, maṇḍapaṁ kārayiṁ ahaṁ.
Satāsanasahassāni, chattacchāyāya paññapiṁ; Pacchimaṁ āsanaṁ mayhaṁ, adhikaṁ satamagghati.
Satāsanasahassāni, chattacchāyāya paññapiṁ; Paṭiyādetvā annapānaṁ, kālaṁ ārocayiṁ ahaṁ.
Ārocitamhi kālamhi, padumuttaro mahāmuni; Vasīsatasahassehi, nivesanamupesi me.
Dhārentaṁ uparicchattaṁ, suphullapupphamaṇḍape; Vasīsatasahassehi, nisīdi purisuttamo.
‘Chattasatasahassāni, satasahassamāsanaṁ; Kappiyaṁ anavajjañca, paṭigaṇhāhi cakkhuma’.
Padumuttaro lokavidū, āhutīnaṁ paṭiggaho; Mamaṁ tāretukāmo so, sampaṭicchi mahāmuni.
1.6. Dānakathā Bhikkhuno ekamekassa, Paccekaṁ pattamadāsahaṁ; Jahiṁsu sumbhakaṁ pattaṁ, Lohapattaṁ adhārayuṁ.
Sattarattindivaṁ buddho, nisīdi pupphamaṇḍape; Bodhayanto bahū satte, dhammacakkaṁ pavattayi.
Dhammacakkaṁ pavattento, heṭṭhato pupphamaṇḍape; Cullāsītisahassānaṁ, dhammābhisamayo ahu.
Sattame divase patte, padumuttaro mahāmuni; Chattacchāyāyamāsīno, imā gāthā abhāsatha.
1.7. Byākaraṇa ‘Anūnakaṁ dānavaraṁ, yo me pādāsi māṇavo; Tamahaṁ kittayissāmi, suṇātha mama bhāsato.
Hatthī assā rathā pattī, senā ca caturaṅginī; Parivāressantimaṁ niccaṁ, sabbadānassidaṁ phalaṁ.
Hatthiyānaṁ assayānaṁ, sivikā sandamānikā; Upaṭṭhissantimaṁ niccaṁ, sabbadānassidaṁ phalaṁ.
Saṭṭhi rathasahassāni, sabbālaṅkārabhūsitā; Parivāressantimaṁ niccaṁ, sabbadānassidaṁ phalaṁ.
Saṭṭhi tūriyasahassāni, bheriyo samalaṅkatā; Vajjayissantimaṁ niccaṁ, sabbadānassidaṁ phalaṁ.
Chaḷāsītisahassāni, nāriyo samalaṅkatā; Vicittavatthābharaṇā, āmukkamaṇikuṇḍalā.
Aḷārapamhā hasulā, susaññā tanumajjhimā; Parivāressantimaṁ niccaṁ, sabbadānassidaṁ phalaṁ.
Tiṁsakappasahassāni, devaloke ramissati; Sahassakkhattuṁ devindo, devarajjaṁ karissati.
Sahassakkhattuṁ rājā ca, cakkavattī bhavissati; Padesarajjaṁ vipulaṁ, gaṇanāto asaṅkhiyaṁ.
Devaloke vasantassa, puññakammasamaṅgino; Devalokapariyantaṁ, ratanachattaṁ dharissati.
Icchissati yadā chāyaṁ, chadanaṁ dussapupphajaṁ; Imassa cittamaññāya, nibaddhaṁ chādayissati.
Devalokā cavitvāna, sukkamūlena codito; Puññakammena saṁyutto, brahmabandhu bhavissati.
Kappasatasahassamhi, okkākakulasambhavo; Gotamo nāma gottena, satthā loke bhavissati.
Sabbametaṁ abhiññāya, gotamo sakyapuṅgavo; Bhikkhusaṅghe nisīditvā, etadagge ṭhapessati.
Pilindavacchanāmena, hessati satthusāvako; Devānaṁ asurānañca, gandhabbānañca sakkato.
Bhikkhūnaṁ bhikkhunīnañca, gihīnañca tatheva so; Piyo hutvāna sabbesaṁ, viharissatināsavo’.
1.8. Dānānisaṁsakathā Satasahasse kataṁ kammaṁ, phalaṁ dassesi me idha; Sumutto saravegova, kilese jhāpayī mama.
Aho me sukataṁ kammaṁ, puññakkhette anuttare; Yattha kāraṁ karitvāna, pattomhi acalaṁ padaṁ.
Anūnakaṁ dānavaraṁ, adāsi yo hi māṇavo; Ādipubbaṅgamo āsi, tassa dānassidaṁ phalaṁ.
1.8.1. Chattānisaṁsa Chatte ca sugate datvā, saṅghe gaṇavaruttame; Aṭṭhānisaṁse anubhomi, kammānucchavike mama.
Sītaṁ uṇhaṁ na jānāmi, rajojallaṁ na limpati; Anupaddavo anīti ca, homi apacito sadā.
Sukhumacchaviko homi, visadaṁ hoti mānasaṁ; Chattasatasahassāni, bhave saṁsarato mama.
Sabbālaṅkārayuttāni, tassa kammassa vāhasā; Imaṁ jātiṁ ṭhapetvāna, matthake dhārayanti me.
Kasmā imāya jātiyā, natthi me chattadhāraṇā; Mama sabbaṁ kataṁ kammaṁ, vimuttichattapattiyā.
1.8.2. Dussānisaṁsa Dussāni sugate datvā, saṅghe gaṇavaruttame; Aṭṭhānisaṁse anubhomi, kammānucchavike mama.
Suvaṇṇavaṇṇo virajo, sappabhāso patāpavā; Siniddhaṁ hoti me gattaṁ, bhave saṁsarato mama.
Dussasatasahassāni, setā pītā ca lohitā; Dhārenti matthake mayhaṁ, dussadānassidaṁ phalaṁ.
Koseyyakambaliyāni, khomakappāsikāni ca; Sabbattha paṭilabhāmi, tesaṁ nissandato ahaṁ.
1.8.3. Pattānisaṁsa Patte sugate datvāna, saṅghe gaṇavaruttame; Dasānisaṁse anubhomi, kammānucchavike mama.
Suvaṇṇathāle maṇithāle, rajatepi ca thālake; Lohitaṅgamaye thāle, paribhuñjāmi sabbadā.
Anupaddavo anīti ca, homi apacito sadā; Lābhī annassa pānassa, vatthassa sayanassa ca.
Na vinassanti me bhogā, ṭhitacitto bhavāmahaṁ; Dhammakāmo sadā homi, appakleso anāsavo.
Devaloke manusse vā, anubandhā ime guṇā; Chāyā yathāpi rukkhassa, sabbattha na jahanti maṁ.
1.8.4. Vāsiānisaṁsa Cittabandhanasambaddhā, sukatā vāsiyo bahū; Datvāna buddhaseṭṭhassa, saṅghassa ca tathevahaṁ.
Aṭṭhānisaṁse anubhomi, kammānucchavike mama; Sūro homavisārī ca, vesārajjesu pāramī.
Dhitivīriyavā homi, paggahītamano sadā; Kilesacchedanaṁ ñāṇaṁ, sukhumaṁ atulaṁ suciṁ; Sabbattha paṭilabhāmi, tassa nissandato ahaṁ.
1.8.5. Satthakānisaṁsa Akakkase apharuse, sudhote satthake bahū; Pasannacitto datvāna, buddhe saṅghe tatheva ca.
Pañcānisaṁse anubhomi, kammānucchavike mama; Kalyāṇamittaṁ vīriyaṁ, khantiñca mettasatthakaṁ.
Taṇhāsallassa chinnattā, paññāsatthaṁ anuttaraṁ; Vajirena samaṁ ñāṇaṁ, tesaṁ nissandato labhe.
1.8.6. Sūciānisaṁsa Sūciyo sugate datvā, saṅghe gaṇavaruttame; Pañcānisaṁse anubhomi, kammānucchavike mama.
Na saṁsayo kaṅkhacchedo, abhirūpo ca bhogavā; Tikkhapañño sadā homi, saṁsaranto bhavābhave.
Gambhīraṁ nipuṇaṁ ṭhānaṁ, atthaṁ ñāṇena passayiṁ; Vajiraggasamaṁ ñāṇaṁ, hoti me tamaghātanaṁ.
1.8.7. Nakhacchedanānisaṁsa Nakhacchedane sugate, datvā saṅghe gaṇuttame; Pañcānisaṁse anubhomi, kammānucchavike mama.
Dāsidāse gavasse ca, bhatake nāṭake bahū; Nhāpite bhattake sūde, sabbattheva labhāmahaṁ.
1.8.8. Vidhūpanatālavaṇṭānisaṁsa Vidhūpane sugate datvā, tālavaṇṭe ca sobhane; Aṭṭhānisaṁse anubhomi, kammānucchavike mama.
Sītaṁ uṇhaṁ na jānāmi, pariḷāho na vijjati; Darathaṁ nābhijānāmi, cittasantāpanaṁ mama.
Rāgaggi dosamohaggi, mānaggi diṭṭhiaggi ca; Sabbaggī nibbutā mayhaṁ, tassa nissandato mama.
1.8.9. Morahattha-cāmara Morahatthe cāmariyo, datvā saṅghe gaṇuttame; Upasantakilesohaṁ, viharāmi anaṅgaṇo.
1.8.10. Parissāvana-dhammakara Parissāvane sugate, datvā dhammakaruttame; Pañcānisaṁse anubhomi, kammānucchavike mama.
Sabbesaṁ samatikkamma, dibbaṁ āyuṁ labhāmahaṁ; Appasayho sadā homi, corapaccatthikehi vā.
Satthena vā visena vā, vihesampi na kubbate; Antarāmaraṇaṁ natthi, tesaṁ nissandato mama.
1.8.11. Teladhārānisaṁsa Teladhāre sugate datvā, saṅghe gaṇavaruttame; Pañcānisaṁse anubhomi, kammānucchavike mama.
Sucārurūpo subhaddo, susamuggatamānaso; Avikkhittamano homi, sabbārakkhehi rakkhito.
1.8.12. Sūcigharānisaṁsa Sūcighare sugate datvā, saṅghe gaṇavaruttame; Tīṇānisaṁse anubhomi, kammānucchavike mama.
Cetosukhaṁ kāyasukhaṁ, iriyāpathajaṁ sukhaṁ; Ime guṇe paṭilabhe, tassa nissandato ahaṁ.
1.8.13. Aṁsabaddhānisaṁsa Aṁsabaddhe jine datvā, saṅghe gaṇavaruttame; Tīṇānisaṁse anubhomi, kammānucchavike mama.
Saddhamme gādhaṁ vindāmi, Sarāmi dutiyaṁ bhavaṁ; Sabbattha succhavī homi, Tassa nissandato ahaṁ.
1.8.14. Kāyabandhanānisaṁsa Kāyabandhe jine datvā, saṅghe gaṇavaruttame; Chānisaṁse anubhomi, kammānucchavike mama.
Samādhīsu na kampāmi, vasī homi samādhisu; Abhejjapariso homi, ādeyyavacano sadā.
Upaṭṭhitasati homi, tāso mayhaṁ na vijjati; Devaloke manusse vā, anubandhā ime guṇā.
1.8.15. Ādhārakānisaṁsa Ādhārake jine datvā, saṅghe gaṇavaruttame; Pañcavaṇṇehi dāyādo, acalo homi kenaci.
Ye keci me sutā dhammā, satiñāṇappabodhanā; Dhatā me na vinassanti, bhavanti suvinicchitā.
1.8.16. Bhājanānisaṁsa Bhājane paribhoge ca, datvā buddhe gaṇuttame; Tīṇānisaṁse anubhomi, kammānucchavike mama.
Soṇṇamaye maṇimaye, athopi phalikāmaye; Lohitaṅgamaye ceva, labhāmi bhājane ahaṁ.
Bhariyā dāsadāsī ca, hatthissarathapattike; Itthī patibbatā ceva, paribhogāni sabbadā.
Vijjā mantapade ceva, vividhe āgame bahū; Sabbaṁ sippaṁ nisāmemi, paribhogāni sabbadā.
1.8.17. Thālakānisaṁsa Thālake sugate datvā, saṅghe gaṇavaruttame; Tīṇānisaṁse anubhomi, kammānucchavike mama.
Soṇṇamaye maṇimaye, athopi phalikāmaye; Lohitaṅgamaye ceva, labhāmi thālake ahaṁ.
Asatthake phalamaye, atho pokkharapattake; Madhupānakasaṅkhe ca, labhāmi thālake ahaṁ.
Vatte guṇe paṭipatti, ācārakiriyāsu ca; Ime guṇe paṭilabhe, tassa nissandato ahaṁ.
1.8.18. Bhesajjānisaṁsa Bhesajjaṁ sugate datvā, saṅghe gaṇavaruttame; Dasānisaṁse anubhomi, kammānucchavike mama.
Āyuvā balavā dhīro, vaṇṇavā yasavā sukhī; Anupaddavo anīti ca, homi apacito sadā; Na me piyaviyogatthi, tassa nissandato mama.
1.8.19. Upāhanānisaṁsa Upāhane jine datvā, saṅghe gaṇavaruttame; Tīṇānisaṁse anubhomi, kammānucchavike mama.
Hatthiyānaṁ assayānaṁ, sivikā sandamānikā; Saṭṭhisatasahassāni, parivārenti maṁ sadā.
Maṇimayā tambamayā, soṇṇarajatapādukā; Nibbattanti paduddhāre, bhave saṁsarato mama.
Niyāmaṁ sati dhāvanti, āguācārasodhanaṁ; Ime guṇe paṭilabhe, tassa nissandato ahaṁ.
1.8.20. Pādukānisaṁsa Pāduke sugate datvā, saṅghe gaṇavaruttame; Iddhipādukamāruyha, viharāmi yadicchakaṁ.
1.8.21. Udakapuñchanānisaṁsa Udakapuñchanacoḷe, datvā buddhe gaṇuttame; Pañcānisaṁse anubhomi, kammānucchavike mama.
Suvaṇṇavaṇṇo virajo, sappabhāso patāpavā; Siniddhaṁ hoti me gattaṁ, rajojallaṁ na limpati; Ime guṇe paṭilabhe, tassa nissandato ahaṁ.
1.8.22. Kattaradaṇḍānisaṁsa Kattaradaṇḍe sugate, datvā saṅghe gaṇuttame; Chānisaṁse anubhomi, kammānucchavike mama.
Puttā mayhaṁ bahū honti, tāso mayhaṁ na vijjati; Appasayho sadā homi, sabbārakkhehi rakkhito; Khalitampi na jānāmi, abhantaṁ mānasaṁ mama.
1.8.23. Osadhañjanānisaṁsa Osadhaṁ añjanaṁ datvā, buddhe saṅghe gaṇuttame; Aṭṭhānisaṁse anubhomi, kammānucchavike mama.
Visālanayano homi, setapīto ca lohito; Anāvilapasannakkho, sabbarogavivajjito.
Labhāmi dibbanayanaṁ, paññācakkhuṁ anuttaraṁ; Ime guṇe paṭilabhe, tassa nissandato ahaṁ.
1.8.24. Kuñcikānisaṁsa Kuñcike sugate datvā, saṅghe gaṇavaruttame; Dhammadvāravivaraṇaṁ, labhāmi ñāṇakuñcikaṁ.
1.8.25. Kuñcikāgharānisaṁsa Kuñcikānaṁ ghare datvā, buddhe saṅghe gaṇuttame; Dvānisaṁse anubhomi, kammānucchavike mama; Appakodho anāyāso, saṁsaranto bhave ahaṁ.
1.8.26. Āyogānisaṁsa Āyoge sugate datvā, saṅghe gaṇavaruttame; Pañcānisaṁse anubhomi, kammānucchavike mama.
Samādhīsu na kampāmi, vasī homi samādhisu; Abhejjapariso homi, ādeyyavacano sadā; Jāyati bhogasampatti, bhave saṁsarato mama.
1.8.27. Dhūmanettānisaṁsa Dhūmanette jine datvā, saṅghe gaṇavaruttame; Tīṇānisaṁse anubhomi, kammānucchavike mama.
Sati me ujukā hoti, susambandhā ca nhāravo; Labhāmi dibbanayanaṁ, tassa nissandato ahaṁ.
1.8.28. Dīpadhārānisaṁsa Dīpadhāre jine datvā, saṅghe gaṇavaruttame; Tīṇānisaṁse anubhomi, kammānucchavike mama.
Jātimā aṅgasampanno, paññavā buddhasammato; Ime guṇe paṭilabhe, tassa nissandato ahaṁ.
1.8.29. Tumbaka-karaṇḍa Tumbake ca karaṇḍe ca, datvā buddhe gaṇuttame; Dasānisaṁse anubhomi, kammānucchavike mama.
Sugutto sukhasamaṅgī, Mahāyaso tathāgati; Vipattivigato sukhumālo, Sabbītiparivajjito.
Vipule ca guṇe lābhī, samāva calanā mama; Suvivajjitaubbego, tumbake ca karaṇḍake.
Labhāmi caturo vaṇṇe, hatthissaratanāni ca; Tāni me na vinassanti, tumbadāne idaṁ phalaṁ.
1.8.30. Malaharaṇānisaṁsa Malaharaṇiyo datvā, buddhe saṅghe gaṇuttame; Pañcānisaṁse anubhomi, kammānucchavike mama.
Sabbalakkhaṇasampanno, āyupaññāsamāhito; Sabbāyāsavinimutto, kāyo me hoti sabbadā.
1.8.31. Pipphalānisaṁsa Taṇudhāre sunisite, saṅghe datvāna pipphale; Kilesakantanaṁ ñāṇaṁ, labhāmi atulaṁ suciṁ.
1.8.32. Saṇḍāsānisaṁsa Saṇḍāse sugate datvā, saṅghe gaṇavaruttame; Kilesabhañjanaṁ ñāṇaṁ, labhāmi atulaṁ suciṁ.
1.8.33. Natthukānisaṁsa Natthuke sugate datvā, saṅghe gaṇavaruttame; Aṭṭhānisaṁse anubhomi, kammānucchavike mama.
Saddhaṁ sīlaṁ hiriñcāpi, atha ottappiyaṁ guṇaṁ; Sutaṁ cāgañca khantiñca, paññaṁ me aṭṭhamaṁ guṇaṁ.
1.8.34. Pīṭhakānisaṁsa Pīṭhake sugate datvā, saṅghe gaṇavaruttame; Pañcānisaṁse anubhomi, kammānucchavike mama.
Ucce kule pajāyāmi, mahābhogo bhavāmahaṁ; Sabbe maṁ apacāyanti, kitti abbhuggatā mama.
Kappasatasahassāni, pallaṅkā caturassakā; Parivārenti maṁ niccaṁ, saṁvibhāgarato ahaṁ.
1.8.35. Bhisiānisaṁsa Bhisiyo sugate datvā, saṅghe gaṇavaruttame; Chānisaṁse anubhomi, kammānucchavike mama.
Samasugattopacito, muduko cārudassano; Labhāmi ñāṇaparivāraṁ, bhisidānassidaṁ phalaṁ.
Tūlikā vikatikāyo, kaṭṭissā cittakā bahū; Varapotthake kambale ca, labhāmi vividhe ahaṁ.
Pāvārike ca muduke, mudukājinaveṇiyo; Labhāmi vividhatthāre, bhisidānassidaṁ phalaṁ.
Yato sarāmi attānaṁ, yato pattosmi viññutaṁ; Atuccho jhānamañcomhi, bhisidānassidaṁ phalaṁ.
1.8.36. Bibbohanānisaṁsa Bibbohane jine datvā, saṅghe gaṇavaruttame; Chānisaṁse anubhomi, kammānucchavike mama.
Uṇṇike padumake ca, atho lohitacandane; Bibbohane upādhemi, uttamaṅgaṁ sadā mama.
Aṭṭhaṅgike maggavare, sāmaññe caturo phale; Tesu ñāṇaṁ uppādetvā, vihare niccakālikaṁ.
Dāne dame saṁyame ca, appamaññāsu rūpisu; Tesu ñāṇaṁ uppādetvā, vihare sabbakālikaṁ.
Vatte guṇe paṭipatti, ācārakiriyāsu ca; Tesu ñāṇaṁ uppādetvā, vihare sabbadā ahaṁ.
Caṅkame vā padhāne vā, vīriye bodhipakkhiye; Tesu ñāṇaṁ uppādetvā, viharāmi yadicchakaṁ.
Sīlaṁ samādhi paññā ca, vimutti ca anuttarā; Tesu ñāṇaṁ uppādetvā, viharāmi sukhaṁ ahaṁ.
1.8.37. Phalapīṭhānisaṁsa Phalapīṭhe jine datvā, saṅghe gaṇavaruttame; Dvānisaṁse anubhomi, kammānucchavike mama.
Soṇṇamaye maṇimaye, dantasāramaye bahū; Pallaṅkaseṭṭhe vindāmi, phalapīṭhassidaṁ phalaṁ.
1.8.38. Pādapīṭhānisaṁsa Pādapīṭhe jine datvā, saṅghe gaṇavaruttame; Dvānisaṁse anubhomi, kammānucchavike mama; Labhāmi bahuke yāne, pādapīṭhassidaṁ phalaṁ.
Dāsī dāsā ca bhariyā, ye caññe anujīvino; Sammā paricarante maṁ, pādapīṭhassidaṁ phalaṁ.
1.8.39. Telabbhañjanānisaṁsa Telaabbhañjane datvā, saṅghe gaṇavaruttame; Pañcānisaṁse anubhomi, kammānucchavike mama.
Abyādhitā rūpavatā, khippaṁ dhammanisantitā; Lābhitā annapānassa, āyupañcamakaṁ mama.
1.8.40. Sappitelānisaṁsa Sappitelañca datvāna, saṅghe gaṇavaruttame; Pañcānisaṁse anubhomi, kammānucchavike mama.
Thāmavā rūpasampanno, pahaṭṭhatanujo sadā; Abyādhi visado homi, sappitelassidaṁ phalaṁ.
1.8.41. Mukhasodhanakānisaṁsa Mukhasodhanakaṁ datvā, buddhe saṅghe gaṇuttame; Pañcānisaṁse anubhomi, kammānucchavike mama.
Visuddhakaṇṭho madhurassaro, Kāsasāsavivajjito; Uppalagandho mukhato, Upavāyati me sadā.
1.8.42. Dadhiānisaṁsa Dadhiṁ datvāna sampannaṁ, buddhe saṅghe gaṇuttame; Bhuñjāmi amataṁ bhattaṁ, varaṁ kāyagatāsatiṁ.
1.8.43. Madhuānisaṁsa Vaṇṇagandharasopetaṁ, madhuṁ datvā jine gaṇe; Anūpamaṁ atuliyaṁ, pive muttirasaṁ ahaṁ.
1.8.44. Rasānisaṁsa Yathābhūtaṁ rasaṁ datvā, buddhe saṅghe gaṇuttame; Caturo phale anubhomi, kammānucchavike mama.
1.8.45. Annapānānisaṁsa Annaṁ pānañca datvāna, buddhe saṅghe gaṇuttame; Dasānisaṁse anubhomi, kammānucchavike mama.
Āyuvā balavā dhīro, vaṇṇavā yasavā sukhī; Lābhī annassa pānassa, sūro paññāṇavā sadā; Ime guṇe paṭilabhe, saṁsaranto bhave ahaṁ.
1.8.46. Dhūpānisaṁsa Dhūpaṁ datvāna sugate, saṅghe gaṇavaruttame; Dasānisaṁse anubhomi, kammānucchavike mama.
Sugandhadeho yasavā, sīghapañño ca kittimā; Tikkhapañño bhūripañño, hāsagambhīrapaññavā.
Vepullajavanapañño, saṁsaranto bhavābhave; Tasseva vāhasā dāni, patto santisukhaṁ sivaṁ.
1.9. Sādhāraṇānisaṁsa Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.
Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.
Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.
Itthaṁ sudaṁ āyasmā pilindavaccho thero imā gāthāyo abhāsitthāti.
Pilindavacchattherassāpadānaṁ paṭhamaṁ.