Therāpadāna Sakiṁsammajjakavagga

0

Therāpadāna Sakiṁsammajjakavagga Sakiṁsammajjakattheraapadāna

1

“Vipassino bhagavato, vri:58.1 · sya:33.24 pāṭaliṁ bodhimuttamaṁ; Disvāva taṁ pādapaggaṁ, tattha cittaṁ pasādayiṁ.

2

Sammajjaniṁ gahetvāna, bodhiṁ sammajji tāvade; Sammajjitvāna taṁ bodhiṁ, avandiṁ pāṭaliṁ ahaṁ.

3

Tattha cittaṁ pasādetvā, sire katvāna añjaliṁ; Namassamāno taṁ bodhiṁ, gañchiṁ paṭikuṭiṁ ahaṁ.

4

Tādimaggena gacchāmi, vri:58.2 saranto bodhimuttamaṁ; Ajagaro maṁ pīḷesi, ghorarūpo mahabbalo.

5

Āsanne me kataṁ kammaṁ, phalena tosayī mamaṁ; Kaḷevaraṁ me gilati, devaloke ramāmahaṁ.

6

Anāvilaṁ mama cittaṁ, visuddhaṁ paṇḍaraṁ sadā; Sokasallaṁ na jānāmi, cittasantāpanaṁ mama.

7

Kuṭṭhaṁ gaṇḍo kilāso ca, apamāro vitacchikā; Daddu kaṇḍu ca me natthi, phalaṁ sammajjanāyidaṁ.

8

Soko ca paridevo ca, hadaye me na vijjati; Abhantaṁ ujukaṁ cittaṁ, phalaṁ sammajjanāyidaṁ.

9

Samādhīsu na majjāmi, sya:33.25 visadaṁ hoti mānasaṁ; Yaṁ yaṁ samādhimicchāmi, so so sampajjate mamaṁ.

10

Rajanīye na rajjāmi, atho dussaniyesu ca; Mohanīye na muyhāmi, phalaṁ sammajjanāyidaṁ.

11

Ekanavutito kappe, yaṁ kammamakariṁ tadā; Duggatiṁ nābhijānāmi, phalaṁ sammajjanāyidaṁ.

12

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

13

Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.

14

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

15

Itthaṁ sudaṁ āyasmā sakiṁsammajjako thero imā gāthāyo abhāsitthāti.

16

Sakiṁsammajjakattherassāpadānaṁ paṭhamaṁ.