← _

Therāpadāna Phaladāyakavagga

id: tha-ap513 VRI: vol 58 สยามรัฐ: vol 33 29 segments
Therāpadāna Phaladāyakavagga 1 Kurañciyaphaladāyakattheraapadāna
“Migaluddo pure āsiṁ, vipine vicaraṁ ahaṁ; Addasaṁ virajaṁ buddhaṁ, sabbadhammāna pāraguṁ.
Kurañciyaphalaṁ gayha, buddhaseṭṭhassadāsahaṁ; Puññakkhettassa tādino, pasanno sehi pāṇibhi.
Ekatiṁse ito kappe, yaṁ phalaṁ adadiṁ tadā; Duggatiṁ nābhijānāmi, phaladānassidaṁ phalaṁ.
Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.
Svāgataṁ vata me āsi, buddhaseṭṭhassa santike; Tisso vijjā anuppattā, kataṁ buddhassa sāsanaṁ.
Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.
Itthaṁ sudaṁ āyasmā kurañciyaphaladāyako thero imā gāthāyo abhāsitthāti.
Kurañciyaphaladāyakattherassāpadānaṁ paṭhamaṁ.