Itivuttaka 50 Tikanipāta
id: iti50 VRI: vol 48 17 segments
Itivuttaka 50 Tikanipāta Paṭhamavagga Mūlasutta
Vuttañhetaṁ bhagavatā vuttamarahatāti me sutaṁ: vri:48.33
“Tīṇimāni, bhikkhave, akusalamūlāni. Katamāni tīṇi? Lobho akusalamūlaṁ, doso akusalamūlaṁ, moho akusalamūlaṁ— imāni kho, bhikkhave, tīṇi akusalamūlānī”ti. Etamatthaṁ bhagavā avoca. Tatthetaṁ iti vuccati:
“Lobho doso ca moho ca, purisaṁ pāpacetasaṁ; Hiṁsanti attasambhūtā, tacasāraṁva samphalan”ti.
Ayampi attho vutto bhagavatā, iti me sutanti. Paṭhamaṁ.