← _

Theravāda Vinaya Mahāvibhaṅga

id: pli-tv-bu-vb-pc56 VRI: vol 88 สยามรัฐ: vol 2 70 segments
Theravāda Vinaya Mahāvibhaṅga Pācittiyakaṇḍa Surāpānavagga 56. Jotikasikkhāpada
Tena samayena buddho bhagavā bhaggesu viharati susumāragire bhesakaḷāvane migadāye. Tena kho pana samayena bhikkhū hemantike kāle aññataraṁ mahantaṁ susirakaṭṭhaṁ jotiṁ samādahitvā visibbesuṁ. Tasmiñca susire kaṇhasappo agginā santatto nikkhamitvā bhikkhū paripātesi. Bhikkhū tahaṁ tahaṁ upadhāviṁsu. Ye te bhikkhū appicchā …pe… te ujjhāyanti khiyyanti vipācenti— “kathañhi nāma bhikkhū jotiṁ samādahitvā visibbessantī”ti …pe… “saccaṁ kira, bhikkhave, bhikkhū jotiṁ samādahitvā visibbentī”ti? “Saccaṁ, bhagavā”ti. Vigarahi buddho bhagavā …pe… kathañhi nāma te, bhikkhave, moghapurisā jotiṁ samādahitvā visibbessanti. Netaṁ, bhikkhave, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu visibbanāpekkho jotiṁ samādaheyya vā samādahāpeyya vā, pācittiyan”ti. Evañcidaṁ bhagavatā bhikkhūnaṁ sikkhāpadaṁ paññattaṁ hoti. Tena kho pana samayena bhikkhū gilānā honti. Gilānapucchakā bhikkhū gilāne bhikkhū etadavocuṁ— “kaccāvuso, khamanīyaṁ, kacci yāpanīyan”ti? “Pubbe mayaṁ, āvuso, jotiṁ samādahitvā visibbema; tena no phāsu hoti. Idāni pana ‘bhagavatā paṭikkhittan’ti kukkuccāyantā na visibbema, tena no na phāsu hotī”ti. Bhagavato etamatthaṁ ārocesuṁ …pe… anujānāmi, bhikkhave, gilānena bhikkhunā jotiṁ samādahitvā vā samādahāpetvā vā visibbetuṁ. Evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu agilāno visibbanāpekkho jotiṁ samādaheyya vā samādahāpeyya vā, pācittiyan”ti. Evañcidaṁ bhagavatā bhikkhūnaṁ sikkhāpadaṁ paññattaṁ hoti.
Tena kho pana samayena bhikkhū padīpepi jotikepi jantāgharepi kukkuccāyanti. Bhagavato etamatthaṁ ārocesuṁ …pe… anujānāmi, bhikkhave, tathārūpappaccayā jotiṁ samādahituṁ samādahāpetuṁ. Evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu agilāno visibbanāpekkho jotiṁ samādaheyya vā samādahāpeyya vā, aññatra tathārūpappaccayā, pācittiyan”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Agilāno nāma yassa vinā agginā phāsu hoti. Gilāno nāma yassa vinā agginā na phāsu hoti. Visibbanāpekkhoti tappitukāmo. Joti nāma aggi vuccati. Samādaheyyāti sayaṁ samādahati, āpatti pācittiyassa. Samādahāpeyyāti aññaṁ āṇāpeti, āpatti pācittiyassa. Sakiṁ āṇatto bahukampi samādahati, āpatti pācittiyassa. Aññatra tathā rūpappaccayāti ṭhapetvā tathārūpappaccayaṁ. Agilāno agilānasaññī visibbanāpekkho jotiṁ samādahati vā samādahāpeti vā, aññatra tathārūpappaccayā, āpatti pācittiyassa. Agilāno vematiko visibbanāpekkho jotiṁ samādahati vā samādahāpeti vā, aññatra tathārūpappaccayā, āpatti pācittiyassa. Agilāno gilānasaññī visibbanāpekkho jotiṁ samādahati vā samādahāpeti vā, aññatra tathārūpappaccayā, āpatti pācittiyassa. Paṭilātaṁ ukkhipati, āpatti dukkaṭassa. Gilāno agilānasaññī, āpatti dukkaṭassa. Gilāno vematiko, āpatti dukkaṭassa. Gilāno gilānasaññī, anāpatti. Anāpatti— gilānassa, aññena kataṁ visibbeti, vītaccitaṅgāraṁ visibbeti, padīpe jotike jantāghare tathārūpappaccayā, āpadāsu, ummattakassa, ādikammikassāti. Jotikasikkhāpadaṁ niṭṭhitaṁ chaṭṭhaṁ.