← _

Theravāda Vinaya Mahāvibhaṅga

id: pli-tv-bu-vb-ss5 VRI: vol 87 สยามรัฐ: vol 1 780 segments
Theravāda Vinaya Mahāvibhaṅga Saṅghādisesakaṇḍa 5. Sañcarittasikkhāpada
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena āyasmā udāyī sāvatthiyaṁ kulūpako hoti. Bahukāni kulāni upasaṅkamati. Yattha passati kumārakaṁ vā apajāpatikaṁ, kumārikaṁ vā apatikaṁ, kumārakassa mātāpitūnaṁ santike kumārikāya vaṇṇaṁ bhaṇati— “amukassa kulassa kumārikā abhirūpā dassanīyā pāsādikā paṇḍitā byattā medhāvinī dakkhā analasā. Channā sā kumārikā imassa kumārakassā”ti. Te evaṁ vadanti— “ete kho, bhante, amhe na jānanti—‘ke vā ime kassa vā’ti. Sace, bhante, ayyo dāpeyya āneyyāma mayaṁ taṁ kumārikaṁ imassa kumārakassā”ti. Kumārikāya mātāpitūnaṁ santike kumārakassa vaṇṇaṁ bhaṇati— “amukassa kulassa kumārako abhirūpo dassanīyo pāsādiko paṇḍito byatto medhāvī dakkho analaso. Channāyaṁ kumārikā tassa kumārakassā”ti. Te evaṁ vadanti— “ete kho, bhante, amhe na jānanti—‘ke vā ime kassa vā’ti, kismiṁ viya kumārikāya vattuṁ. Sace, bhante, ayyo yācāpeyya dajjeyyāma mayaṁ imaṁ kumārikaṁ tassa kumārakassā”ti. Eteneva upāyena āvāhānipi kārāpeti, vivāhānipi kārāpeti, vāreyyānipi kārāpeti. Tena kho pana samayena aññatarissā purāṇagaṇakiyā dhītā abhirūpā hoti dassanīyā pāsādikā. Tirogāmakā ājīvakasāvakā āgantvā taṁ gaṇakiṁ etadavocuṁ— “dehāyye, imaṁ kumārikaṁ amhākaṁ kumārakassā”ti. Sā evamāha—“ahaṁ khvayyo, tumhe na jānāmi—‘ke vā ime kassa vā’ti. Ayañca me ekadhītikā, tirogāmo ca gantabbo, nāhaṁ dassāmī”ti. Manussā te ājīvakasāvake etadavocuṁ— “kissa tumhe, ayyo, āgatatthā”ti? “Idha mayaṁ, ayyo, amukaṁ nāma gaṇakiṁ dhītaraṁ yācimhā amhākaṁ kumārakassa. Sā evamāha—‘ahaṁ khvayyo, tumhe na jānāmi—ke vā ime kassa vā’ti. Ayañca me ekadhītikā, tirogāmo ca gantabbo, nāhaṁ dassāmī”ti. “Kissa tumhe, ayyo, taṁ gaṇakiṁ dhītaraṁ yācittha? Nanu ayyo udāyī vattabbo. Ayyo udāyī dāpessatī”ti. Atha kho te ājīvakasāvakā yenāyasmā udāyī tenupasaṅkamiṁsu; upasaṅkamitvā āyasmantaṁ udāyiṁ etadavocuṁ— “idha mayaṁ, bhante, amukaṁ nāma gaṇakiṁ dhītaraṁ yācimhā amhākaṁ kumārakassa. Sā evamāha—‘ahaṁ khvayyo, tumhe na jānāmi—ke vā ime kassa vāti. Ayañca me ekadhītikā, tirogāmo ca gantabbo, nāhaṁ dassāmī’ti. Sādhu, bhante, ayyo taṁ gaṇakiṁ dhītaraṁ dāpetu amhākaṁ kumārakassā”ti. Atha kho āyasmā udāyī yena sā gaṇakī tenupasaṅkami; upasaṅkamitvā taṁ gaṇakiṁ etadavoca— “kissimesaṁ dhītaraṁ na desī”ti? “Ahaṁ khvayya, ime na jānāmi—‘ke vā ime kassa vā’ti. Ayañca me ekadhītikā, tirogāmo ca gantabbo, nāhaṁ dassāmī”ti. “Dehimesaṁ. Ahaṁ ime jānāmī”ti. “Sace, bhante, ayyo jānāti, dassāmī”ti. Atha kho sā gaṇakī tesaṁ ājīvakasāvakānaṁ dhītaraṁ adāsi. Atha kho te ājīvakasāvakā taṁ kumārikaṁ netvā māsaṁyeva suṇisabhogena bhuñjiṁsu. Tato aparena dāsibhogena bhuñjanti. Atha kho sā kumārikā mātuyā santike dūtaṁ pāhesi— “ahañhi duggatā dukkhitā, na sukhaṁ labhāmi. Māsaṁyeva maṁ suṇisabhogena bhuñjiṁsu. Tato aparena dāsibhogena bhuñjanti. Āgacchatu me, mātā, maṁ nessatū”ti. Atha kho sā gaṇakī yena te ājīvakasāvakā tenupasaṅkami; upasaṅkamitvā te ājīvakasāvake etadavoca— “māyyo, imaṁ kumārikaṁ dāsibhogena bhuñjittha. Suṇisabhogena imaṁ kumārikaṁ bhuñjathā”ti. Te evamāhaṁsu— “natthamhākaṁ tayā saddhiṁ āhārūpahāro, samaṇena saddhiṁ amhākaṁ āhārūpahāro, gaccha tvaṁ, na mayaṁ taṁ jānāmā”ti. Atha kho sā gaṇakī tehi ājīvakasāvakehi apasāditā punadeva sāvatthiṁ paccāgañchi. Dutiyampi kho sā kumārikā mātuyā santike dūtaṁ pāhesi— “ahañhi duggatā dukkhitā, na sukhaṁ labhāmi. Māsaṁyeva maṁ suṇisabhogena bhuñjiṁsu. Tato aparena dāsibhogena bhuñjanti. Āgacchatu me, mātā, maṁ nessatū”ti. Atha kho sā gaṇakī yenāyasmā udāyī tenupasaṅkami; upasaṅkamitvā āyasmantaṁ udāyiṁ etadavoca— “sā kira, bhante, kumārikā duggatā dukkhitā, na sukhaṁ labhati. Māsaṁyeva naṁ suṇisabhogena bhuñjiṁsu. Tato aparena dāsibhogena bhuñjanti. Vadeyyātha, bhante— ‘māyyo, imaṁ kumārikaṁ dāsibhogena bhuñjittha. Suṇisabhogena imaṁ kumārikaṁ bhuñjathā’”ti. Atha kho āyasmā udāyī yena te ājīvakasāvakā tenupasaṅkami; upasaṅkamitvā te ājīvakasāvake etadavoca— “māyyo, imaṁ kumārikaṁ dāsibhogena bhujjittha. Suṇisabhogena imaṁ kumārikaṁ bhuñjathā”ti. Te evamāhaṁsu— “natthamhākaṁ tayā saddhiṁ āhārūpahāro, gaṇakiyā saddhiṁ amhākaṁ āhārūpahāro. Samaṇena bhavitabbaṁ abyāvaṭena. Samaṇo assa susamaṇo, gaccha tvaṁ, na mayaṁ taṁ jānāmā”ti. Atha kho āyasmā udāyī tehi ājīvakasāvakehi apasādito punadeva sāvatthiṁ paccāgañchi. Tatiyampi kho sā kumārikā mātuyā santike dūtaṁ pāhesi— “ahañhi duggatā dukkhitā, na sukhaṁ labhāmi. Māsaṁyeva maṁ suṇisabhogena bhuñjiṁsu. Tato aparena dāsibhogena bhuñjanti. Āgacchatu me, mātā, maṁ nessatū”ti. Dutiyampi kho sā gaṇakī yenāyasmā udāyī tenupasaṅkami; upasaṅkamitvā āyasmantaṁ udāyiṁ etadavoca— “sā kira, bhante, kumārikā duggatā dukkhitā, na sukhaṁ labhati. Māsaṁyeva naṁ suṇisabhogena bhuñjiṁsu. Tato aparena dāsibhogena bhuñjanti. Vadeyyātha, bhante— ‘māyyo, imaṁ kumārikaṁ dāsibhogena bhuñjittha, suṇisabhogena imaṁ kumārikaṁ bhuñjathā’”ti. “Paṭhamampāhaṁ tehi ājīvakasāvakehi apasādito, gaccha tvaṁ, nāhaṁ gamissāmī”ti. Atha kho sā gaṇakī ujjhāyati khiyyati vipāceti— “evaṁ duggato hotu ayyo udāyī, evaṁ dukkhito hotu ayyo udāyī, evaṁ mā sukhaṁ labhatu ayyo udāyī, yathā me kumārikā duggatā dukkhitā na sukhaṁ labhati pāpikāya sassuyā pāpakena sasurena pāpakena sāmikenā”ti. Sāpi kho kumārikā ujjhāyati khiyyati vipāceti— “evaṁ duggato hotu ayyo udāyī, evaṁ dukkhito hotu ayyo udāyī, evaṁ mā sukhaṁ labhatu ayyo udāyī, yathāhaṁ duggatā dukkhitā na sukhaṁ labhāmi pāpikāya sassuyā pāpakena sasurena pāpakena sāmikenā”ti. Aññāpi itthiyo asantuṭṭhā sassūhi vā sasurehi vā sāmikehi vā, tā evaṁ oyācanti— “evaṁ duggato hotu ayyo udāyī, evaṁ dukkhito hotu ayyo udāyī, evaṁ mā sukhaṁ labhatu ayyo udāyī, yathā mayaṁ duggatā dukkhitā na sukhaṁ labhāma pāpikāhi sassūhi pāpakehi sasurehi pāpakehi sāmikehī”ti. Yā pana tā itthiyo santuṭṭhā sassūhi vā sasurehi vā sāmikehi vā tā evaṁ āyācanti— “evaṁ sukhito hotu ayyo udāyī, evaṁ sajjito hotu ayyo udāyī, evaṁ sukhamedho hotu ayyo udāyī, yathā mayaṁ sukhitā sajjitā sukhamedhā bhaddikāhi sassūhi bhaddakehi sasurehi bhaddakehi sāmikehī”ti. Assosuṁ kho bhikkhū ekaccānaṁ itthīnaṁ oyācantīnaṁ ekaccānaṁ itthīnaṁ āyācantīnaṁ. Ye te bhikkhū appicchā …pe… te ujjhāyanti khiyyanti vipācenti— “kathañhi nāma āyasmā udāyī sañcarittaṁ samāpajjissatī”ti. Atha kho te bhikkhū āyasmantaṁ udāyiṁ anekapariyāyena vigarahitvā bhagavato etamatthaṁ ārocesuṁ. Atha kho bhagavā etasmiṁ nidāne etasmiṁ pakaraṇe bhikkhusaṅghaṁ sannipātāpetvā āyasmantaṁ udāyiṁ paṭipucchi— “saccaṁ kira tvaṁ, udāyi, sañcarittaṁ samāpajjasī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, sañcarittaṁ samāpajjissasi. Netaṁ, moghapurisa, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu sañcarittaṁ samāpajjeyya, itthiyā vā purisamatiṁ purisassa vā itthimatiṁ, jāyattane vā jārattane vā, saṅghādiseso”ti. Evañcidaṁ bhagavatā bhikkhūnaṁ sikkhāpadaṁ paññattaṁ hoti.
Tena kho pana samayena sambahulā dhuttā uyyāne paricārentā aññatarissā vesiyā santike dūtaṁ pāhesuṁ— “āgacchatu uyyāne paricāressāmā”ti. Sā evamāha— “ahaṁ khvayyo, tumhe na jānāmi—‘ke vā ime kassa vā’ti. Ahañcamhi bahubhaṇḍā bahuparikkhārā, bahinagarañca gantabbaṁ. Nāhaṁ gamissāmī”ti. Atha kho so dūto tesaṁ dhuttānaṁ etamatthaṁ ārocesi. Evaṁ vutte, aññataro puriso te dhutte etadavoca— “kissa tumhe, ayyo, etaṁ vesiṁ yācittha? Nanu ayyo udāyī vattabbo. Ayyo udāyī uyyojessatī”ti. Evaṁ vutte, aññataro upāsako taṁ purisaṁ etadavoca— “māyyo, evaṁ avaca. Na kappati samaṇānaṁ sakyaputtiyānaṁ evarūpaṁ kātuṁ. Nāyyo udāyī evaṁ karissatī”ti. Evaṁ vutte, “karissati na karissatī”ti abbhutamakaṁsu. Atha kho te dhuttā yenāyasmā udāyī tenupasaṅkamiṁsu; upasaṅkamitvā āyasmantaṁ udāyiṁ etadavocuṁ— “idha mayaṁ, bhante, uyyāne paricārentā asukāya nāma vesiyā santike dūtaṁ pahiṇimhā— ‘āgacchatu uyyāne paricāressāmā’ti. Sā evamāha—‘ahaṁ khvayyo, tumhe na jānāmi—ke vā ime kassa vāti, ahañcamhi bahubhaṇḍā bahuparikkhārā, bahinagarañca gantabbaṁ. Nāhaṁ gamissāmī’ti. Sādhu, bhante, ayyo taṁ vesiṁ uyyojetū”ti. Atha kho āyasmā udāyī yena sā vesī tenupasaṅkami; upasaṅkamitvā taṁ vesiṁ etadavoca— “kissimesaṁ na gacchasī”ti? “Ahaṁ khvayya, ime na jānāmi—‘ke vā ime kassa vā’ti. Ahañcamhi bahubhaṇḍā bahuparikkhārā, bahinagarañca gantabbaṁ. Nāhaṁ gamissāmī”ti. “Gacchimesaṁ. Ahaṁ ime jānāmī”ti. “Sace, bhante, ayyo jānāti ahaṁ gamissāmī”ti. Atha kho te dhuttā taṁ vesiṁ ādāya uyyānaṁ agamaṁsu. Atha kho so upāsako ujjhāyati khiyyati vipāceti— “kathañhi nāma ayyo udāyī taṅkhaṇikaṁ sañcarittaṁ samāpajjissatī”ti. Assosuṁ kho bhikkhū tassa upāsakassa ujjhāyantassa khiyyantassa vipācentassa. Ye te bhikkhū appicchā …pe… te ujjhāyanti khiyyanti vipācenti— “kathañhi nāma āyasmā udāyī taṅkhaṇikaṁ sañcarittaṁ samāpajjissatī”ti. Atha kho te bhikkhū āyasmantaṁ udāyiṁ anekapariyāyena vigarahitvā bhagavato etamatthaṁ ārocesuṁ …pe… “saccaṁ kira tvaṁ, udāyi, taṅkhaṇikaṁ sañcarittaṁ samāpajjasī”ti? “Saccaṁ, bhagavā”ti. Vigarahi buddho bhagavā …pe… kathañhi nāma tvaṁ, moghapurisa, taṅkhaṇikaṁ sañcarittaṁ samāpajjissasi? Netaṁ, moghapurisa, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu sañcarittaṁ samāpajjeyya, itthiyā vā purisamatiṁ purisassa vā itthimatiṁ, jāyattane vā jārattane vā, antamaso taṅkhaṇikāyapi, saṅghādiseso”ti.
Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Sañcarittaṁ samāpajjeyyāti itthiyā vā pahito purisassa santike gacchati, purisena vā pahito itthiyā santike gacchati. Itthiyā vā purisamatinti purisassa matiṁ itthiyā āroceti. Purisassa vā itthimatinti itthiyā matiṁ purisassa āroceti. Jāyattane vāti jāyā bhavissasi. Jārattane vāti jārī bhavissasi. Antamaso taṅkhaṇikāyapīti muhuttikā bhavissasi. Saṅghādisesoti …pe… tenapi vuccati “saṅghādiseso”ti.
Dasa itthiyo— māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sārakkhā saparidaṇḍā. Dasa bhariyāyo— dhanakkītā chandavāsinī bhogavāsinī paṭavāsinī odapattakinī obhaṭacumbaṭā dāsī ca bhariyā ca kammakārī ca bhariyā ca dhajāhaṭā muhuttikā. Māturakkhitā nāma mātā rakkhati gopeti issariyaṁ kāreti vasaṁ vatteti. Piturakkhitā nāma pitā rakkhati gopeti issariyaṁ kāreti vasaṁ vatteti. Mātāpiturakkhitā nāma mātāpitaro rakkhanti gopenti issariyaṁ kārenti vasaṁ vattenti. Bhāturakkhitā nāma bhātā rakkhati gopeti issariyaṁ kāreti vasaṁ vatteti. Bhaginirakkhitā nāma bhaginī rakkhati gopeti issariyaṁ kāreti vasaṁ vatteti. Ñātirakkhitā nāma ñātakā rakkhanti gopenti issariyaṁ kārenti vasaṁ vattenti. Gottarakkhitā nāma sagottā rakkhanti gopenti issariyaṁ kārenti vasaṁ vattenti. Dhammarakkhitā nāma sahadhammikā rakkhanti gopenti issariyaṁ kārenti vasaṁ vattenti. Sārakkhā nāma gabbhepi pariggahitā hoti— mayhaṁ esāti. Antamaso mālāguḷaparikkhittāpi. Saparidaṇḍā nāma kehici daṇḍo ṭhapito hoti—yo itthannāmaṁ itthiṁ gacchati ettako daṇḍoti. Dhanakkītā nāma dhanena kiṇitvā vāseti. Chandavāsinī nāma piyo piyaṁ vāseti. Bhogavāsinī nāma bhogaṁ datvā vāseti. Paṭavāsinī nāma paṭaṁ datvā vāseti. Odapattakinī nāma udakapattaṁ āmasitvā vāseti. Obhaṭacumbaṭā nāma cumbaṭaṁ oropetvā vāseti. Dāsī nāma dāsī ceva hoti bhariyā ca. Kammakārī nāma kammakārī ceva hoti bhariyā ca. Dhajāhaṭā nāma karamarānītā vuccati. Muhuttikā nāma taṅkhaṇikā vuccati. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ piturakkhitaṁ brūhi …pe… mātāpiturakkhitaṁ brūhi … bhāturakkhitaṁ brūhi … bhaginirakkhitaṁ brūhi … ñātirakkhitaṁ brūhi … gottarakkhitaṁ brūhi … dhammarakkhitaṁ brūhi … sārakkhaṁ brūhi … saparidaṇḍaṁ brūhi— ‘hohi kira itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ māturakkhitañca mātāpiturakkhitañca …pe… māturakkhitañca bhāturakkhitañca … māturakkhitañca bhaginirakkhitañca … māturakkhitañca ñātirakkhitañca … māturakkhitañca gottarakkhitañca … māturakkhitañca dhammarakkhitañca … māturakkhitañca sārakkhañca … māturakkhitañca saparidaṇḍañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Puriso bhikkhuṁ pahiṇati— “gaccha, bhante, itthannāmaṁ piturakkhitañca mātāpiturakkhitañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ piturakkhitañca bhāturakkhitañca …pe… piturakkhitañca bhaginirakkhitañca … piturakkhitañca ñātirakkhitañca … piturakkhitañca gottarakkhitañca … piturakkhitañca dhammarakkhitañca … piturakkhitañca sārakkhañca … piturakkhitañca saparidaṇḍañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ piturakkhitañca māturakkhitañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ mūlaṁ saṅkhittaṁ. (…) Puriso bhikkhuṁ pahiṇati— “gaccha, bhante, itthannāmaṁ saparidaṇḍañca māturakkhitañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ saparidaṇḍañca piturakkhitañca …pe… saparidaṇḍañca mātāpiturakkhitañca … saparidaṇḍañca bhāturakkhitañca … saparidaṇḍañca bhaginirakkhitañca … saparidaṇḍañca ñātirakkhitañca … saparidaṇḍañca gottarakkhitañca … saparidaṇḍañca dhammarakkhitañca … saparidaṇḍañca sārakkhañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Evaṁ dumūlakampi timūlakampi yāva navamūlakaṁ kātabbaṁ. Idaṁ dasamūlakaṁ— Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca mātāpiturakkhitañca bhāturakkhitañca bhaginirakkhitañca ñātirakkhitañca gottarakkhitañca dhammarakkhitañca sārakkhañca saparidaṇḍañca brūhi— ‘hotha kira itthannāmassa bhariyāyo dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Dhanakkītācakkaṁ niṭṭhitaṁ. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ piturakkhitaṁ brūhi …pe… mātāpiturakkhitaṁ brūhi … bhāturakkhitaṁ brūhi … bhaginirakkhitaṁ brūhi … ñātirakkhitaṁ brūhi … gottarakkhitaṁ brūhi … dhammarakkhitaṁ brūhi … sārakkhaṁ brūhi … saparidaṇḍaṁ brūhi— ‘hohi kira itthannāmassa bhariyā muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ māturakkhitañca mātāpiturakkhitañca …pe… māturakkhitañca saparidaṇḍañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Puriso bhikkhuṁ pahiṇati— “gaccha, bhante, itthannāmaṁ piturakkhitañca mātāpiturakkhitañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ piturakkhitañca bhāturakkhitañca …pe… piturakkhitañca saparidaṇḍañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ piturakkhitañca māturakkhitañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ mūlaṁ saṅkhittaṁ. Puriso bhikkhuṁ pahiṇati— “gaccha, bhante, itthannāmaṁ saparidaṇḍañca māturakkhitañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ saparidaṇḍañca piturakkhitañca …pe… saparidaṇḍañca sārakkhañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakādīnipi evameva kātabbāni. Idaṁ dasamūlakaṁ— Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca mātāpiturakkhitañca bhāturakkhitañca bhaginirakkhitañca ñātirakkhitañca gottarakkhitañca dhammarakkhitañca sārakkhañca saparidaṇḍañca brūhi— ‘hotha kira itthannāmassa bhariyāyo muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Muhuttikācakkaṁ niṭṭhitaṁ. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā dhanakkītā ca chandavāsinī cā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā dhanakkītā ca bhogavāsinī ca …pe… dhanakkītā ca paṭavāsinī ca … dhanakkītā ca odapattakinī ca … dhanakkītā ca obhaṭacumbaṭā ca … dhanakkītā ca dāsī ca bhariyā ca … dhanakkītā ca kammakārī ca bhariyā ca … dhanakkītā ca dhajāhaṭā ca … dhanakkītā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā chandavāsinī ca bhogavāsinī ca …pe… chandavāsinī ca muhuttikā ca … chandavāsinī ca dhanakkītā cā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ mūlaṁ saṅkhittaṁ. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā muhuttikā ca dhanakkītā ca …pe… muhuttikā ca chandavāsinī ca …pe… muhuttikā ca dhajāhaṭā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakādīnipi evameva kātabbāni. Idaṁ dasamūlakaṁ— Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Māturakkhitācakkaṁ niṭṭhitaṁ. Puriso bhikkhuṁ pahiṇati— “gaccha, bhante, itthannāmaṁ piturakkhitaṁ …pe… mātāpiturakkhitaṁ … bhāturakkhitaṁ … bhaginirakkhitaṁ … ñātirakkhitaṁ … gottarakkhitaṁ … dhammarakkhitaṁ … sārakkhaṁ … saparidaṇḍaṁ brūhi— ‘hohi kira itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ saparidaṇḍaṁ brūhi— ‘hohi kira itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Puriso bhikkhuṁ pahiṇati— “gaccha, bhante, itthannāmaṁ saparidaṇḍaṁ brūhi— ‘hohi kira itthannāmassa bhariyā dhanakkītā ca chandavāsinī cā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ saparidaṇḍaṁ brūhi— ‘hohi kira itthannāmassa bhariyā dhanakkītā ca bhogavāsinī ca …pe… dhanakkītā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Puriso bhikkhuṁ pahiṇati— “gaccha, bhante, itthannāmaṁ saparidaṇḍaṁ brūhi— ‘hohi kira itthannāmassa bhariyā chandavāsinī ca bhogavāsinī ca …pe… chandavāsinī ca muhuttikā ca … chandavāsinī ca dhanakkītā cā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ mūlaṁ saṅkhittaṁ. Puriso bhikkhuṁ pahiṇati— “gaccha, bhante, itthannāmaṁ saparidaṇḍaṁ brūhi— ‘hohi kira itthannāmassa bhariyā muhuttikā ca dhanakkītā ca …pe… muhuttikā ca chandavāsinī ca …pe… muhuttikā ca dhajāhaṭā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakampi timūlakampi yāva navamūlakaṁ evameva kātabbaṁ. Idaṁ dasamūlakaṁ— Puriso bhikkhuṁ pahiṇati— “gaccha, bhante, itthannāmaṁ saparidaṇḍaṁ brūhi— ‘hohi kira itthannāmassa bhariyā dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Saparidaṇḍācakkaṁ niṭṭhitaṁ. Puriso bhikkhuṁ pahiṇati— “gaccha, bhante, itthannāmaṁ māturakkhitaṁ brūhi— ‘hohi kira itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca brūhi— ‘hotha kira itthannāmassa bhariyāyo dhanakkītā ca chandavāsinī cā’”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca mātāpiturakkhitañca brūhi— ‘hotha kira itthannāmassa bhariyāyo dhanakkītā ca chandavāsinī ca bhogavāsinī cā’”ti. Paṭiggaṇhāti vīmaṁsati paccāharati, āpatti saṅghādisesassa. Evaṁ ubhatovaḍḍhakaṁ kātabbaṁ. Puriso bhikkhuṁ pahiṇati— “gaccha, bhante, itthannāmaṁ māturakkhitañca piturakkhitañca mātāpiturakkhitañca bhāturakkhitañca bhaginirakkhitañca ñātirakkhitañca gottarakkhitañca dhammarakkhitañca sārakkhañca saparidaṇḍañca brūhi— ‘hotha kira itthannāmassa bhariyāyo dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ubhatovaḍḍhakaṁ niṭṭhitaṁ. Purisassa mātā bhikkhuṁ pahiṇati …pe… purisassa pitā bhikkhuṁ pahiṇati …pe… purisassa mātāpitaro bhikkhuṁ pahiṇanti …pe… purisassa bhātā bhikkhuṁ pahiṇati …pe… purisassa bhaginī bhikkhuṁ pahiṇati …pe… purisassa ñātakā bhikkhuṁ pahiṇanti …pe… purisassa gottā bhikkhuṁ pahiṇanti …pe… purisassa sahadhammikā bhikkhuṁ pahiṇanti …pe…. Purisassa peyyālo vitthāretabbo. Ubhatovaḍḍhakaṁ yathā purimanayo tatheva vitthāretabbaṁ. Māturakkhitāya mātā bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Māturakkhitāya mātā bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Māturakkhitāya mātā bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā dhanakkītā ca chandavāsinī ca …pe… dhanakkītā ca bhogavāsinī ca …pe… dhanakkītā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Māturakkhitāya mātā bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā chandavāsinī ca bhogavāsinī ca …pe… chandavāsinī ca muhuttikā ca … chandavāsinī ca dhanakkītā cā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ mūlaṁ saṅkhittaṁ. Māturakkhitāya mātā bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā muhuttikā ca dhanakkītā ca …pe… muhuttikā ca chandavāsinī ca …pe… muhuttikā ca dhajāhaṭā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakampi timūlakampi yāva navamūlakaṁ evameva kātabbaṁ. Idaṁ dasamūlakaṁ— Māturakkhitāya mātā bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Mātucakkaṁ niṭṭhitaṁ. Piturakkhitāya pitā bhikkhuṁ pahiṇati …pe… mātāpiturakkhitāya mātāpitaro bhikkhuṁ pahiṇanti … bhāturakkhitāya bhātā bhikkhuṁ pahiṇati … bhaginirakkhitāya bhaginī bhikkhuṁ pahiṇati … ñātirakkhitāya ñātakā bhikkhuṁ pahiṇanti … gottarakkhitāya gottā bhikkhuṁ pahiṇanti … dhammarakkhitāya sahadhammikā bhikkhuṁ pahiṇanti … sārakkhāya yena pariggahitā hoti so bhikkhuṁ pahiṇati … saparidaṇḍāya yena daṇḍo ṭhapito hoti so bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Saparidaṇḍāya yena daṇḍo ṭhapito hoti so bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Saparidaṇḍāya yena daṇḍo ṭhapito hoti so bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā dhanakkītā ca chandavāsinī ca …pe… dhanakkītā ca bhogavāsinī ca …pe… dhanakkītā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Saparidaṇḍāya yena daṇḍo ṭhapito hoti so bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā chandavāsinī ca bhogavāsinī ca …pe… chandavāsinī ca muhuttikā ca … chandavāsinī ca dhanakkītā cā’”ti. Paṭiggaṇhāti vīmaṁsati paccāharati āpatti saṅghādisesassa. Baddhacakkaṁ mūlaṁ saṅkhittaṁ. Saparidaṇḍāya yena daṇḍo, ṭhapito hoti so bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā muhuttikā ca dhanakkītā ca …pe… muhuttikā ca chandavāsinī ca …pe… muhuttikā ca dhajāhaṭā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakampi timūlakampi yāva navamūlakaṁ evameva kātabbaṁ. Idaṁ dasamūlakaṁ— Saparidaṇḍāya yena daṇḍo ṭhapito hoti so bhikkhuṁ pahiṇati— “gaccha, bhante, itthannāmaṁ brūhi— ‘hotu itthannāmassa bhariyā dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Daṇḍaṭhapitacakkaṁ niṭṭhitaṁ. Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā ca chandavāsinī cā’”ti. Paṭiggaṇhāti vīmaṁsati paccāharati, āpatti saṅghādisesassa. Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā ca bhogavāsinī ca …pe… dhanakkītā ca paṭavāsinī ca …pe… dhanakkītā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā chandavāsinī ca bhogavāsinī ca …pe… chandavāsinī ca muhuttikā ca … chandavāsinī ca dhanakkītā cā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ mūlaṁ saṅkhittaṁ. Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā muhuttikā ca dhanakkītā ca …pe… muhuttikā ca chandavāsinī ca …pe… muhuttikā ca dhajāhaṭā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakādīnipi evameva kātabbāni. Idaṁ dasamūlakaṁ— Māturakkhitā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Aparaṁ māturakkhitācakkaṁ niṭṭhitaṁ. Piturakkhitā bhikkhuṁ pahiṇati …pe… mātāpiturakkhitā bhikkhuṁ pahiṇati … bhāturakkhitā bhikkhuṁ pahiṇati … bhaginirakkhitā bhikkhuṁ pahiṇati … ñātirakkhitā bhikkhuṁ pahiṇati … gottarakkhitā bhikkhuṁ pahiṇati … dhammarakkhitā bhikkhuṁ pahiṇati … sārakkhā bhikkhuṁ pahiṇati … saparidaṇḍā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā’”ti. Paṭiggaṇhāti vīmaṁsati paccāharati, āpatti saṅghādisesassa. Saparidaṇḍā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā chandavāsinī …pe… bhogavāsinī … paṭavāsinī … odapattakinī … obhaṭacumbaṭā … dāsī ca bhariyā ca … kammakārī ca bhariyā ca … dhajāhaṭā … muhuttikā’”ti. Paṭiggaṇhāti vīmaṁsati paccāharati, āpatti saṅghādisesassa. Nikkhepapadāni. Saparidaṇḍā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā ca chandavāsinī ca …pe… dhanakkītā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Khaṇḍacakkaṁ. Saparidaṇḍā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā chandavāsinī ca bhogavāsinī ca …pe… chandavāsinī ca muhuttikā ca … chandavāsinī ca dhanakkītā cā’”ti. Paṭiggaṇhāti vīmaṁsati paccāharati, āpatti saṅghādisesassa. Baddhacakkaṁ, mūlaṁ saṅkhittaṁ. Saparidaṇḍā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā muhuttikā ca dhanakkītā ca …pe… muhuttikā ca chandavāsinī ca …pe… muhuttikā ca dhajāhaṭā cā’”ti. Paṭiggaṇhāti vīmaṁsati paccāharati, āpatti saṅghādisesassa. Ekamūlakaṁ niṭṭhitaṁ. Dumūlakādīnipi evameva kātabbāni. Idaṁ dasamūlakaṁ— Saparidaṇḍā bhikkhuṁ pahiṇati— “gaccha, bhante, itthannāmaṁ brūhi— ‘homi itthannāmassa bhariyā dhanakkītā ca chandavāsinī ca bhogavāsinī ca paṭavāsinī ca odapattakinī ca obhaṭacumbaṭā ca dāsī ca bhariyā ca kammakārī ca bhariyā ca dhajāhaṭā ca muhuttikā cā’”ti. Paṭiggaṇhāti vīmaṁsati paccāharati, āpatti saṅghādisesassa. Aparaṁ saparidaṇḍācakkaṁ niṭṭhitaṁ. Sabbaṁ cakkapeyyālaṁ niṭṭhitaṁ. Paṭiggaṇhāti vīmaṁsati paccāharati, āpatti saṅghādisesassa. Paṭiggaṇhāti vīmaṁsati na paccāharati, āpatti thullaccayassa. Paṭiggaṇhāti na vīmaṁsati paccāharati, āpatti thullaccayassa. Paṭiggaṇhāti na vīmaṁsati na paccāharati, āpatti dukkaṭassa. Na paṭiggaṇhāti vīmaṁsati paccāharati, āpatti thullaccayassa. Na paṭiggaṇhāti vīmaṁsati na paccāharati, āpatti dukkaṭassa. Na paṭiggaṇhāti na vīmaṁsati paccāharati, āpatti dukkaṭassa. Na paṭiggaṇhāti na vīmaṁsati na paccāharati, anāpatti. Puriso sambahule bhikkhū āṇāpeti— “gacchatha, bhante, itthannāmaṁ itthiṁ vīmaṁsathā”ti. Sabbe paṭiggaṇhanti sabbe vīmaṁsanti sabbe paccāharanti, āpatti sabbesaṁ saṅghādisesassa. Puriso sambahule bhikkhū āṇāpeti— “gacchatha, bhante, itthannāmaṁ itthiṁ vīmaṁsathā”ti. Sabbe paṭiggaṇhanti sabbe vīmaṁsanti ekaṁ paccāharāpenti, āpatti sabbesaṁ saṅghādisesassa. Puriso sambahule bhikkhū āṇāpeti— “gacchatha, bhante, itthannāmaṁ itthiṁ vīmaṁsathā”ti. Sabbe paṭiggaṇhanti ekaṁ vīmaṁsāpetvā sabbe paccāharanti, āpatti sabbesaṁ saṅghādisesassa. Puriso sambahule bhikkhū āṇāpeti— “gacchatha, bhante, itthannāmaṁ itthiṁ vīmaṁsathā”ti. Sabbe paṭiggaṇhanti ekaṁ vīmaṁsāpetvā ekaṁ paccāharāpenti, āpatti sabbesaṁ saṅghādisesassa. Puriso bhikkhuṁ āṇāpeti— “gaccha, bhante, itthannāmaṁ itthiṁ vīmaṁsā”ti. Paṭiggaṇhāti vīmaṁsati paccāharati, āpatti saṅghādisesassa. Puriso bhikkhuṁ āṇāpeti— “gaccha, bhante, itthannāmaṁ itthiṁ vīmaṁsā”ti. Paṭiggaṇhāti vīmaṁsati antevāsiṁ paccāharāpeti, āpatti saṅghādisesassa. Puriso bhikkhuṁ āṇāpeti— “gaccha, bhante, itthannāmaṁ itthiṁ vīmaṁsā”ti. Paṭiggaṇhāti antevāsiṁ vīmaṁsāpetvā attanā paccāharati, āpatti saṅghādisesassa. Puriso bhikkhuṁ āṇāpeti— “gaccha, bhante, itthannāmaṁ itthiṁ vimaṁsā”ti. Paṭiggaṇhāti antevāsiṁ vīmaṁsāpeti antevāsī vīmaṁsitvā bahiddhā paccāharati, āpatti ubhinnaṁ thullaccayassa. Gacchanto sampādeti, āgacchanto visaṁvādeti, āpatti thullaccayassa. Gacchanto visaṁvādeti, āgacchanto sampādeti, āpatti thullaccayassa. Gacchanto sampādeti, āgacchanto sampādeti, āpatti saṅghādisesassa. Gacchanto visaṁvādeti, āgacchanto visaṁvādeti, anāpatti. Anāpatti— saṅghassa vā cetiyassa vā gilānassa vā karaṇīyena gacchati, ummattakassa, ādikammikassāti. 5.1. Vinītavatthuuddānagāthā Suttā matā ca nikkhantā, anitthī itthipaṇḍakā; Kalahaṁ katvāna sammodi, sañcarittañca paṇḍaketi.
5.2. Vinītavatthu Tena kho pana samayena aññataro puriso aññataraṁ bhikkhuṁ āṇāpesi— “gaccha, bhante, itthannāmaṁ itthiṁ vīmaṁsā”ti. So gantvā manusse pucchi— “kahaṁ itthannāmā”ti? “Suttā, bhante”ti. Tassa kukkuccaṁ ahosi— “bhagavatā sikkhāpadaṁ paññattaṁ, kacci nu kho ahaṁ saṅghādisesaṁ āpattiṁ āpanno”ti? Bhagavato etamatthaṁ ārocesi— “Anāpatti, bhikkhu, saṅghādisesassa; āpatti dukkaṭassā”ti. Tena kho pana samayena aññataro puriso aññataraṁ bhikkhuṁ āṇāpesi— “gaccha, bhante, itthannāmaṁ itthiṁ vīmaṁsā”ti. So gantvā manusse pucchi— “kahaṁ itthannāmā”ti? “Matā, bhante”ti …pe… “nikkhantā, bhante”ti … “anitthī, bhante”ti … “itthipaṇḍakā, bhante”ti. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti dukkaṭassā”ti. Tena kho pana samayena aññatarā itthī sāmikena saha bhaṇḍitvā mātugharaṁ agamāsi. Kulūpako bhikkhu sammodanīyaṁ akāsi. Tassa kukkuccaṁ ahosi …pe… “alaṁvacanīyā, bhikkhū”ti? “Nālaṁvacanīyā, bhagavā”ti. “Anāpatti, bhikkhu, nālaṁvacanīyāyā”ti. Tena kho pana samayena aññataro bhikkhu paṇḍake sañcarittaṁ samāpajji. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Sañcarittasikkhāpadaṁ niṭṭhitaṁ pañcamaṁ.