← _

Parivāra 21. Pañcavagga

id: pli-tv-pvr21 VRI: vol 91 สยามรัฐ: vol 8 352 segments
Parivāra 21. Pañcavagga 1. Kammavagga
Cattāri kammāni. Apalokanakammaṁ, ñattikammaṁ, ñattidutiyakammaṁ, ñatticatutthakammaṁ— imāni cattāri kammāni. Katihākārehi vipajjanti? Imāni cattāri kammāni pañcahākārehi vipajjanti— vatthuto vā ñattito vā anussāvanato vā sīmato vā parisato vā.
Kathaṁ vatthuto kammāni vipajjanti? Sammukhākaraṇīyaṁ kammaṁ asammukhā karoti, vatthuvipannaṁ adhammakammaṁ; paṭipucchākaraṇīyaṁ kammaṁ appaṭipucchā karoti, vatthuvipannaṁ adhammakammaṁ; paṭiññāya karaṇīyaṁ kammaṁ appaṭiññāya karoti, vatthuvipannaṁ adhammakammaṁ; sativinayārahassa amūḷhavinayaṁ deti, vatthuvipannaṁ adhammakammaṁ; amūḷhavinayārahassa tassapāpiyasikākammaṁ karoti, vatthuvipannaṁ adhammakammaṁ; tassapāpiyasikākammārahassa tajjanīyakammaṁ karoti, vatthuvipannaṁ adhammakammaṁ; tajjanīyakammārahassa niyassakammaṁ karoti, vatthuvipannaṁ adhammakammaṁ; niyassakammārahassa pabbājanīyakammaṁ karoti, vatthuvipannaṁ adhammakammaṁ; pabbājanīyakammārahassa paṭisāraṇīyakammaṁ karoti, vatthuvipannaṁ adhammakammaṁ; paṭisāraṇīyakammārahassa ukkhepanīyakammaṁ karoti, vatthuvipannaṁ adhammakammaṁ; ukkhepanīyakammārahassa parivāsaṁ deti, vatthuvipannaṁ adhammakammaṁ; parivāsārahaṁ mūlāya paṭikassati, vatthuvipannaṁ adhammakammaṁ; mūlāyapaṭikassanārahassa mānattaṁ deti, vatthuvipannaṁ adhammakammaṁ; mānattārahaṁ abbheti, vatthuvipannaṁ adhammakammaṁ; abbhānārahaṁ upasampādeti, vatthuvipannaṁ adhammakammaṁ; anuposathe uposathaṁ karoti, vatthuvipannaṁ adhammakammaṁ; apavāraṇāya pavāreti, vatthuvipannaṁ adhammakammaṁ. Evaṁ vatthuto kammāni vipajjanti.
Kathaṁ ñattito kammāni vipajjanti? Pañcahākārehi ñattito kammāni vipajjanti— vatthuṁ na parāmasati, saṅghaṁ na parāmasati, puggalaṁ na parāmasati, ñattiṁ na parāmasati, pacchā vā ñattiṁ ṭhapeti— imehi pañcahākārehi ñattito kammāni vipajjanti.
Kathaṁ anussāvanato kammāni vipajjanti? Pañcahākārehi anussāvanato kammāni vipajjanti— vatthuṁ na parāmasati, saṅghaṁ na parāmasati, puggalaṁ na parāmasati, sāvanaṁ hāpeti, akāle vā sāveti— imehi pañcahākārehi anussāvanato kammāni vipajjanti.
Kathaṁ sīmato kammāni vipajjanti? Ekādasahi ākārehi sīmato kammāni vipajjanti— atikhuddakaṁ sīmaṁ sammannati, atimahatiṁ sīmaṁ sammannati, khaṇḍanimittaṁ sīmaṁ sammannati, chāyānimittaṁ sīmaṁ sammannati, animittaṁ sīmaṁ sammannati, bahisīme ṭhito sīmaṁ sammannati, nadiyā sīmaṁ sammannati, samudde sīmaṁ sammannati, jātassare sīmaṁ sammannati, sīmāya sīmaṁ sambhindati, sīmāya sīmaṁ ajjhottharati— imehi ekādasahi ākārehi sīmato kammāni vipajjanti.
Kathaṁ parisato kammāni vipajjanti? Dvādasahi ākārehi parisato kammāni vipajjanti— catuvaggakaraṇe kamme yāvatikā bhikkhū kammapattā te anāgatā honti, chandārahānaṁ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṁ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṁ chando āhaṭo hoti, sammukhībhūtā paṭikkosanti. Pañcavaggakaraṇe kamme …pe… dasavaggakaraṇe kamme …pe… vīsativaggakaraṇe kamme yāvatikā bhikkhū kammapattā te anāgatā honti, chandārahānaṁ chando anāhaṭo hoti, sammukhībhūtā paṭikkosanti, vīsativaggakaraṇe kamme yāvatikā bhikkhū kammapattā te āgatā honti, chandārahānaṁ chando anāhaṭo hoti, sammukhībhūtā paṭikkosanti, vīsativaggakaraṇe kamme yāvatikā bhikkhū kammapattā te āgatā honti, chandārahānaṁ chando āhaṭo hoti, sammukhībhūtā paṭikkosanti— imehi dvādasahi ākārehi parisato kammāni vipajjanti.
Catuvaggakaraṇe kamme cattāro bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho. Pañcavaggakaraṇe kamme pañca bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho. Dasavaggakaraṇe kamme dasa bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho. Vīsativaggakaraṇe kamme vīsati bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho.
Cattāri kammāni— apalokanakammaṁ, ñattikammaṁ, ñattidutiyakammaṁ, ñatticatutthakammaṁ. Imāni cattāri kammāni katihākārehi vipajjanti? Imāni cattāri kammāni pañcahākārehi vipajjanti— vatthuto vā ñattito vā anussāvanato vā sīmato vā parisato vā.
Kathaṁ vatthuto kammāni vipajjanti? Paṇḍakaṁ upasampādeti, vatthuvipannaṁ adhammakammaṁ. Theyyasaṁvāsakaṁ upasampādeti, vatthuvipannaṁ adhammakammaṁ. Titthiyapakkantakaṁ upasampādeti, vatthuvipannaṁ adhammakammaṁ. Tiracchānagataṁ upasampādeti, vatthuvipannaṁ adhammakammaṁ. Mātughātakaṁ upasampādeti, vatthuvipannaṁ adhammakammaṁ. Pitughātakaṁ upasampādeti, vatthuvipannaṁ adhammakammaṁ. Arahantaghātakaṁ upasampādeti, vatthuvipannaṁ adhammakammaṁ. Bhikkhunidūsakaṁ upasampādeti, vatthuvipannaṁ adhammakammaṁ. Saṅghabhedakaṁ upasampādeti, vatthuvipannaṁ adhammakammaṁ. Lohituppādakaṁ upasampādeti, vatthuvipannaṁ adhammakammaṁ. Ubhatobyañjanaṁ upasampādeti, vatthuvipannaṁ adhammakammaṁ. Ūnavīsativassaṁ puggalaṁ upasampādeti, vatthuvipannaṁ adhammakammaṁ. Evaṁ vatthuto kammāni vipajjanti.
Kathaṁ ñattito kammāni vipajjanti? Pañcahākārehi ñattito kammāni vipajjanti. Vatthuṁ na parāmasati, saṅghaṁ na parāmasati, puggalaṁ na parāmasati, ñattiṁ na parāmasati, pacchā vā ñattiṁ ṭhapeti— imehi pañcahākārehi ñattito kammāni vipajjanti.
Kathaṁ anussāvanato kammāni vipajjanti? Pañcahākārehi anussāvanato kammāni vipajjanti— vatthuṁ na parāmasati, saṅghaṁ na parāmasati, puggalaṁ na parāmasati, sāvanaṁ hāpeti, akāle vā sāveti— imehi pañcahākārehi anussāvanato kammāni vipajjanti.
Kathaṁ sīmato kammāni vipajjanti? Ekādasahi ākārehi sīmato kammāni vipajjanti. Atikhuddakaṁ sīmaṁ sammannati, atimahatiṁ sīmaṁ sammannati, khaṇḍanimittaṁ sīmaṁ sammannati, chāyānimittaṁ sīmaṁ sammannati, animittaṁ sīmaṁ sammannati, bahisīme ṭhito sīmaṁ sammannati, nadiyā sīmaṁ sammannati, samudde sīmaṁ sammannati, jātassare sīmaṁ sammannati, sīmāya sīmaṁ sambhindati, sīmāya sīmaṁ ajjhottharati— imehi ekādasahi ākārehi sīmato kammāni vipajjanti.
Kathaṁ parisato kammāni vipajjanti? Dvādasahi ākārehi parisato kammāni vipajjanti— catuvaggakaraṇe kamme yāvatikā bhikkhū kammapattā te anāgatā honti, chandārahānaṁ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṁ chando anāhaṭo hoti, sammukhībhūtā paṭikkosanti. Catuvaggakaraṇe kamme yāvatikā bhikkhū kammapattā te āgatā honti, chandārahānaṁ chando āhaṭo hoti, sammukhībhūtā paṭikkosanti. Pañcavaggakaraṇe kamme …pe… dasavaggakaraṇe kamme …pe… vīsativaggakaraṇe kamme yāvatikā bhikkhū kammapattā te anāgatā honti, chandārahānaṁ chando anāhaṭo hoti, sammukhībhūtā paṭikkosanti. Vīsativaggakaraṇe kamme yāvatikā bhikkhū kammapattā te āgatā honti, chandārahānaṁ chando anāhaṭo hoti, sammukhībhūtā paṭikkosanti. Vīsativaggakaraṇe kamme yāvatikā bhikkhū kammapattā te āgatā honti, chandārahānaṁ chando āhaṭo hoti, sammukhībhūtā paṭikkosanti—imehi dvādasahi ākārehi parisato kammāni vipajjanti.
Apalokanakammaṁ kati ṭhānāni gacchati? Ñattikammaṁ kati ṭhānāni gacchati? Ñattidutiyakammaṁ kati ṭhānāni gacchati? Ñatticatutthakammaṁ kati ṭhānāni gacchati? Apalokanakammaṁ pañca ṭhānāni gacchati. Ñattikammaṁ nava ṭhānāni gacchati. Ñattidutiyakammaṁ satta ṭhānāni gacchati. Ñatticatutthakammaṁ satta ṭhānāni gacchati.
Apalokanakammaṁ katamāni pañca ṭhānāni gacchati? Osāraṇaṁ, nissāraṇaṁ, bhaṇḍukammaṁ, brahmadaṇḍaṁ, kammalakkhaṇaññeva pañcamaṁ— apalokanakammaṁ imāni pañca ṭhānāni gacchati. Ñattikammaṁ katamāni nava ṭhānāni gacchati? Osāraṇaṁ, nissāraṇaṁ, uposathaṁ, pavāraṇaṁ, sammutiṁ, dānaṁ, paṭiggahaṁ, paccukkaḍḍhanaṁ, kammalakkhaṇaññeva navamaṁ— ñattikammaṁ imāni nava ṭhānāni gacchati. Ñattidutiyakammaṁ katamāni satta ṭhānāni gacchati? Osāraṇaṁ, nissāraṇaṁ, sammutiṁ, dānaṁ, uddharaṇaṁ, desanaṁ, kammalakkhaṇaññeva sattamaṁ— ñattidutiyakammaṁ imāni satta ṭhānāni gacchati. Ñatticatutthakammaṁ katamāni satta ṭhānāni gacchati? Osāraṇaṁ, nissāraṇaṁ, sammutiṁ, dānaṁ, niggahaṁ, samanubhāsanaṁ, kammalakkhaṇaññeva sattamaṁ— ñatticatutthakammaṁ imāni satta ṭhānāni gacchati.
Catuvaggakaraṇe kamme cattāro bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho. Pañcavaggakaraṇe kamme pañca bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho. Dasavaggakaraṇe kamme dasa bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho. Vīsativaggakaraṇe kamme vīsati bhikkhū pakatattā kammapattā, avasesā pakatattā chandārahā. Yassa saṅgho kammaṁ karoti so neva kammapatto nāpi chandāraho, api ca kammāraho.
Kammavaggo niṭṭhito paṭhamo.
2. Atthavasavagga Dve atthavase paṭicca tathāgatena sāvakānaṁ sikkhāpadaṁ paññattaṁ. Saṅghasuṭṭhutāya, saṅghaphāsutāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Diṭṭhadhammikānaṁ verānaṁ saṁvarāya, samparāyikānaṁ verānaṁ paṭighātāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Diṭṭhadhammikānaṁ vajjānaṁ saṁvarāya, samparāyikānaṁ vajjānaṁ paṭighātāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Diṭṭhadhammikānaṁ bhayānaṁ saṁvarāya, samparāyikānaṁ bhayānaṁ paṭighātāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Diṭṭhadhammikānaṁ akusalānaṁ dhammānaṁ saṁvarāya, samparāyikānaṁ akusalānaṁ dhammānaṁ paṭighātāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Gihīnaṁ anukampāya, pāpicchānaṁ pakkhupacchedāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Appasannānaṁ pasādāya, pasannānaṁ bhiyyobhāvāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Dve atthavase paṭicca tathāgatena sāvakānaṁ sikkhāpadaṁ paññattaṁ. Saddhammaṭṭhitiyā, vinayānuggahāya— ime dve atthavase paṭicca tathāgatena sāvakānaṁ sikkhāpadaṁ paññattaṁ.
Atthavasavaggo niṭṭhito dutiyo.
3. Paññattavagga Dve atthavase paṭicca tathāgatena sāvakānaṁ pātimokkhaṁ paññattaṁ …pe… pātimokkhuddeso paññatto … pātimokkhaṭṭhapanaṁ paññattaṁ … pavāraṇā paññattā … pavāraṇāṭhapanaṁ paññattaṁ … tajjanīyakammaṁ paññattaṁ … niyassakammaṁ paññattaṁ … pabbājanīyakammaṁ paññattaṁ … paṭisāraṇīyakammaṁ paññattaṁ … ukkhepanīyakammaṁ paññattaṁ … parivāsadānaṁ paññattaṁ … mūlāyapaṭikassanā paññattā … mānattadānaṁ paññattaṁ … abbhānaṁ paññattaṁ … osāraṇīyaṁ paññattaṁ … nissāraṇīyaṁ paññattaṁ … upasampadaṁ paññattaṁ … apalokanakammaṁ paññattaṁ … ñattikammaṁ paññattaṁ … ñattidutiyakammaṁ paññattaṁ … ñatticatutthakammaṁ paññattaṁ …pe….
Paññattavaggo niṭṭhito tatiyo.
4. Apaññattepaññattavagga …pe… Apaññatte paññattaṁ, paññatte anupaññattaṁ …pe… sammukhāvinayo paññatto …pe… sativinayo paññatto …pe… amūḷhavinayo paññatto …pe… paṭiññātakaraṇaṁ paññattaṁ …pe… yebhuyyasikā paññattā …pe… tassapāpiyasikā paññattā …pe… tiṇavatthārako paññatto saṅghasuṭṭhutāya, saṅghaphāsutāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Diṭṭhadhammikānaṁ verānaṁ saṁvarāya, samparāyikānaṁ verānaṁ paṭighātāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Diṭṭhadhammikānaṁ vajjānaṁ saṁvarāya, samparāyikānaṁ vajjānaṁ paṭighātāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Diṭṭhadhammikānaṁ bhayānaṁ saṁvarāya, samparāyikānaṁ bhayānaṁ paṭighātāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Diṭṭhadhammikānaṁ akusalānaṁ dhammānaṁ saṁvarāya, samparāyikānaṁ akusalānaṁ dhammānaṁ paṭighātāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Gihīnaṁ anukampāya, pāpicchānaṁ pakkhupacchedāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Appasannānaṁ pasādāya, pasannānaṁ bhiyyobhāvāya— ime dve atthavase paṭicca tathāgatena sāvakānaṁ tiṇavatthārako paññatto.
Dve atthavase paṭicca tathāgatena sāvakānaṁ tiṇavatthārako paññatto. Saddhammaṭṭhitiyā, vinayānuggahāya— ime dve atthavase paṭicca tathāgatena sāvakānaṁ tiṇavatthārako paññatto.
Apaññatte paññattavaggo niṭṭhito catuttho.
5. Navasaṅgahavagga Navasaṅgahā— vatthusaṅgaho, vipattisaṅgaho āpattisaṅgaho, nidānasaṅgaho, puggalasaṅgaho, khandhasaṅgaho, samuṭṭhānasaṅgaho, adhikaraṇasaṅgaho, samathasaṅgahoti.
Adhikaraṇe samuppanne sace ubho atthapaccatthikā āgacchanti ubhinnampi vatthu ārocāpetabbaṁ. Ubhinnampi vatthuṁ ārocāpetvā ubhinnampi paṭiññā sotabbā. Ubhinnampi paṭiññaṁ sutvā ubhopi vattabbā— “amhākaṁ imasmiṁ adhikaraṇe vūpasamite ubhopi tuṭṭhā bhavissathā”ti. Sace āhaṁsu— “ubhopi tuṭṭhā bhavissāmā”ti, saṅghena taṁ adhikaraṇaṁ sampaṭicchitabbaṁ. Sace alajjussannā hoti, parisā ubbāhikāya vūpasametabbaṁ. Sace bālussannā hoti, parisā vinayadharo pariyesitabbo yena dhammena yena vinayena yena satthusāsanena taṁ adhikaraṇaṁ vūpasammati. Tathā taṁ adhikaraṇaṁ vūpasametabbaṁ.
Vatthu jānitabbaṁ, gottaṁ jānitabbaṁ, nāmaṁ jānitabbaṁ, āpatti jānitabbā.
Methunadhammoti vatthu ceva gottañca— pārājikanti nāmañceva āpatti ca.
Adinnādānanti vatthu ceva gottañca— pārājikanti nāmañceva āpatti ca.
Manussaviggahoti vatthu ceva gottañca— pārājikanti nāmañceva āpatti ca.
Uttarimanussadhammoti vatthu ceva gottañca— pārājikanti nāmañceva āpatti ca.
Sukkavissaṭṭhīti vatthu ceva gottañca— saṅghādisesoti nāmañceva āpatti ca.
Kāyasaṁsaggoti vatthu ceva gottañca— saṅghādisesoti nāmañceva āpatti ca.
Duṭṭhullavācāti vatthu ceva gottañca— saṅghādisesoti nāmañceva āpatti ca.
Attakāmanti vatthu ceva gottañca— saṅghādisesoti nāmañceva āpatti ca.
Sañcarittanti vatthu ceva gottañca— saṅghādisesoti nāmañceva āpatti ca.
Saññācikāya kuṭiṁ kārāpananti vatthu ceva gottañca— saṅghādisesoti nāmañceva āpatti ca.
Mahallakaṁ vihāraṁ kārāpananti vatthu ceva gottañca— saṅghādisesoti nāmañceva āpatti ca.
Bhikkhuṁ amūlakena pārājikena dhammena anuddhaṁsananti vatthu ceva gottañca— saṅghādisesoti nāmañceva āpatti ca.
Bhikkhuṁ aññabhāgiyassa adhikaraṇassa kiñci desaṁ lesamattaṁ upādāya pārājikena dhammena anuddhaṁsananti vatthu ceva gottañca— saṅghādisesoti nāmañceva āpatti ca.
Saṅghabhedakassa bhikkhuno yāvatatiyaṁ samanubhāsanāya na paṭinissajjananti vatthu ceva gottañca— saṅghādisesoti nāmañceva āpatti ca.
Bhedakānuvattakānaṁ bhikkhūnaṁ yāvatatiyaṁ samanubhāsanāya na paṭinissajjananti vatthu ceva gottañca— saṅghādisesoti nāmañceva āpatti ca.
Dubbacassa bhikkhuno yāvatatiyaṁ samanubhāsanāya na paṭinissajjananti vatthu ceva gottañca— saṅghādisesoti nāmañceva āpatti ca.
Kuladūsakassa bhikkhuno yāvatatiyaṁ samanubhāsanāya na paṭinissajjananti vatthu ceva gottañca— saṅghādisesoti nāmañceva āpatti ca …pe….
Anādariyaṁ paṭicca udake uccāraṁ vā passāvaṁ vā kheḷaṁ vā karaṇanti vatthu ceva gottañca— dukkaṭanti nāmañceva āpatti cāti.
Navasaṅgahavaggo niṭṭhito pañcamo.
Tassuddānaṁ
Apalokanaṁ ñatti ca, dutiyaṁ catutthena ca; Vatthu ñatti anussāvanaṁ, sīmā parisameva ca.
Sammukhā paṭipucchā ca, paṭiññā vinayāraho; Vatthu saṅghapuggalañca, ñattiṁ na pacchā ñatti ca.
Vatthuṁ saṅghapuggalañca, sāvanaṁ akālena ca; Atikhuddakā mahantā ca, khaṇḍacchāyā nimittakā.
Bahinadī samudde ca, jātassare ca bhindati; Ajjhottharati sīmāya, catu pañca ca vaggikā.
Dasa vīsativaggā ca, anāhaṭā ca āhaṭā; Kammapattā chandārahā, kammārahā ca puggalā.
Apalokanaṁ pañcaṭṭhānaṁ, ñatti ca navaṭhānikā; Ñatti dutiyaṁ sattaṭṭhānaṁ, catutthā sattaṭhānikā.
Suṭṭhu phāsu ca dummaṅku, pesalā cāpi āsavā; Veravajjabhayañceva, akusalaṁ gihīnañca.
Pāpicchā appasannānaṁ, pasannā dhammaṭṭhapanā; Vinayānuggahā ceva, pātimokkhuddesena ca.
Pātimokkhañca ṭhapanā, Pavāraṇañca ṭhapanaṁ; Tajjanīyā niyassañca, Pabbājanīya paṭisāraṇī.
Ukkhepana parivāsaṁ, mūlamānattaabbhānaṁ; Osāraṇaṁ nissāraṇaṁ, tatheva upasampadā.
Apalokanañatti ca, dutiyañca catutthakaṁ; Apaññattenupaññattaṁ, sammukhāvinayo sati.
Amūḷhapaṭiyebhuyya, pāpiya tiṇavatthārakaṁ; Vatthu vipatti āpatti, nidānaṁ puggalena ca.
Khandhā ceva samuṭṭhānā, adhikaraṇameva ca; Samathā saṅgahā ceva, nāmaāpattikā tathāti.
Parivāro niṭṭhito.
Parivārapāḷi niṭṭhitā.
Pariyosānagāthā
Bubbācariyamaggañca, pucchitvā ca tahiṁ tahiṁ; Dīpanāmo mahāpañño, sutadhāriṁ vicakkhaṇo.
Imaṁ vitthārasaṅkhepaṁ, sajjhāmaggena majjhime; Cintayitvā likhāpesi, sissakānaṁ sukhāvahaṁ.
Parivāranti yaṁ vuttaṁ, sabbaṁ vatthuṁ salakkhaṇaṁ; Atthaṁ atthena saddhamme, dhammaṁ dhammena paññatte.
Sāsanaṁ parivāresi, jambudīpaṁva sāgaro; Parivāraṁ ajānanto, kuto dhammavinicchayaṁ.
Vipatti vatthu paññatti, anupaññatti puggalo; Ekato ubhato ceva, lokapaṇṇatti vajjato.
Yassa jāyati vimati, parivārena chijjati; Cakkavatti mahāsene, migamajjheva kesari.
Ravi raṁsiparikkiṇṇo, cando tāragaṇe yathā; Brahmā brahmaparisāya, gaṇamajjheva nāyako; Evaṁ saddhammavinayo, parivārena sobhatīti.